Na miažy znoŭ možna braniravać miesca ŭ elektronnaj čarzie. Stała našmat zručniej, ale cana VIP-broni šakuje
Z 1 studzienia 2026 hoda abnavili praviły elektronnaj čarhi na miažy. Zaniać miesca stała zručniej, a dla ludziej z hrašyma, jakija śpiašajucca, prydumali VIP-pasłuhu.
Zhodna z novymi praviłami, lehkaviki i matacykły mohuć stanavicca ŭ elektronnuju čarhu anłajn. To-bok ciapier, kab zaniać miesca ŭ čarzie, nie abaviazkova jechać niepasredna ŭ zonu čakańnia pierad punktam propusku.
Košt rehistracyi anłajn — 0,5 bazavaj vieličyni (22,5 rubla). Raniej było 0,3 bazavaj.
Pry hetym pierad zajezdam u punkt propusku ŭsio adno treba prajechać praz zonu čakańnia.
Kali mašyna nie pryjedzie svoječasova, rehistracyja anulujecca biez prava na adnaŭleńnie. Pry hetym pasłuha budzie ličycca akazanaj i, adpaviedna, hrošy nie viernuć. Kab vyjechać za miažu, tym, chto spaźniŭsia, nieabchodna budzie paŭtorna zarehistravacca ŭ elektronnaj čarzie i apłacić pasłuhu.
Aproč hetaha, dla lehkavikoŭ, jakija nakiroŭvajucca ŭ pryvatnuju pajezdku, źjaviłasia mahčymaść zahadzia braniravać datu pryjezdu. Praŭda, košt pasłuhi vielmi vysoki — 15,5 bazavaj vieličyni, a heta 697,5 rubla (kala 200 jeŭra).
Adznačym, što da kanca leta 2022 hoda ŭ Biełarusi ŭžo praktykavali prodaž broni miesca ŭ čarzie ŭ tych punktach propusku, dzie była elektronnaja čarha. Tady takaja pasłuha kaštavała ŭsiaho adnu bazavuju i była dastupnaja nie tolki dla pryvatnych lehkavikoŭ, ale i dla hruzavoha i pasažyrskaha transpartu, jaki vykonvaŭ mižnarodnyja pieravozki.
Praŭda, kali raniej broń za adnu bazavuju była na kankretny čas, to ciapier, zapłaciŭšy 697,5 rubla, možna pryjazdžać u luby čas abranych sutak u intervale z 00:00 da 23:59.
Vyhladaje, što pry vyznačeńni cen na VIP-broń u «Biełmytservisie» aryjentavalisia na tyja sumy, jakija patrabavali za prajezd biez čarhi lhotniki, jakija padsadžvalisia ŭ aŭto. Praŭda, pa 200 jeŭra brali tolki ŭ pikavyja dni, kali čas čakańnia zajmaŭ pa 4‑5 sutak.
Nahadajem, što praz rost bazavaj vieličyni zbor za vyjezd za miažu ciapier kaštuje 45 rubloŭ zamiest raniejšych 43 rubloŭ. Tamu, kab bieź ilhot vyjechać ź Biełarusi ŭ ES na aŭto, treba zapłacić 67,5 rubla (1,5 bazavaj), što składaje kala 20 jeŭra.
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary