Palitviaźniu Juryju Rubcovu dali 2 hady ŭ kałonii ahulnaha režymu

Pružanski rajonny sud prysudziŭ Juryja Rubcova da dvuch hadoŭ pazbaŭleńnia svabody.

* * *

27 maja a 10-j ranicy ŭ Pružanskim rajonnym sudzie pačaŭsia praces nad aktyvistam z Homiela Juryjem Rubcovym. Rubcovu, jaki adbyvaje 1,5 hoda «chimii» ŭ śpieckamendatury vioski Kuplin Pružanskaha rajona, pahražaje jašče 3 hady kałonii.

Pavialičyć

Śledčyja majuć namier dakazać, što Rubcoŭ uchilaŭsia ad adbyćcia pakarańnia, bo admoviŭsia pracavać na tych pracach, jakija prapanoŭvali. Juryj Rubcoŭ na heta zajaŭlaje, što nie admaŭlaŭsia ad pracy zusim, ale patrabavaŭ dać jamu pracu z zarobkam nie mieniej za 600 dalaraŭ na miesiac — što adpaviadaje siaredniestatystyčnamu pakazčyku pa krainie.

U sud pryjechali žonka i syn palitviaźnia, žurnalisty, hramadskija aktyvisty: Leanid Kułakoŭ, Volha Nikałajčyk, Maksim Viniarski i inšyja. Pierad 10:00 pryvieźli samoha Rubcova. Jon vyhladaje zmarniełym i sasłabłym. U budynak prapuścili kala 20-ci čałaviek, paviedamlaje spring96.org.

Pavialičyć

 U zału zaprasili śviedkaŭ - 8 čałaviek. Siarod ich i tyja, chto adbyvaje pakarańnie ŭ papraŭčaj ustanovie adkrytaha typu ŭ Kuplinie.

Juryj Rubcoŭ zapatrabavaŭ, kab vioŭsia aŭdyjozapis pracesa. Sudździa adkazaŭ, što zapis u sudzie možna ažyćciaŭlać tolki pa zhodzie bakoŭ. Prakuror - suprać. Aŭdyjozapis nie dazvolenyja. Fota i videazdymka u zali zabaronienaja. Sudździa Mikałaj Repicha robić zaŭvahu RUbcovu, što biez majki ŭ sudzie znachodzicca nia možna. Rubcoŭ robić repliku, što raniej jaho sudzili napaŭaholenym i nichto na heta nie źviartaŭ uvahi. Sudździa kaža, što zhodna z normami etykietu, treba znachodzicca ŭ zale suda ŭ vopratcy, inakš moža vydalić z zały.

U jakaści śviedki vystupaje načalnik papraŭčaj ustanovy adkrytaha typu №7 padpałkoŭnik Juryj Makajeŭ: zarobak na prapanavanych pasadach Rubcovu prapanoŭvaŭsia ŭ pamiery 4—5 miljonaŭ rubloŭ. Ale jon kateharyčna admaŭlaŭsia. Rubcoŭ admoviŭsia ad podpisu pad zahadam ab pracaŭładkavańni, matyvujučy heta nizkim zarobkam, admaŭlaŭsia ad lubych podpisaŭ naohuł. Zapalčyvy, admoŭnaj skiravanaści, sprabavaŭ stvarać kanflikty z supracoŭnikami - charaktaryzuje śviedka Rubcova.

Sudździa pytajecca, ci moh načalnik zahadać iści pracavać? Načalnik kaža, što ŭ vusnaj formie zahadvaŭ.

Rubcoŭ apieluje da Pracoŭnaha kodeksu i kaža, što jaho nie aznajamlivali z art. 50 Kryminalna-vykanaŭčaha kodeksu.

Advakat pytajecca, chto vydaje nakiravańnie i što tam pavinna być paznačana tam, ci pavinna być paznačanaja data. Śviedka kaža — nieabaviazkova. Na apošnim nakiravańni daty niama. Śviedka kaža, što heta było 13 sakavika. Advakat pytajecca, ci viadoma ab nakiravańni skarhaŭ Rubcova na spahnańni ŭ sud? Tak, ale adkaz pryjšoŭ paśla taho, jak Rubcoŭ byŭ u SIZA. 

Da miesca pracy dastaŭleńnie ažyćciaŭlajecca śpiectranspartam arhanizacyj. Sud pytajecca, čamu prapanoŭvałasia mienavita heta praca, nie prapanavałasia Ci inšaja praca? Nie, nie prapanavałasia.

Advakat pytajecca, ci ŭsio asudžanyja pracaŭładkoŭvajucca, abo tolki Rubcovu tak nastojliva prapanoŭvałasia?

Nastupny śviedka – Aleh Bondar, namieśnik načalnika «chimii»: Kaža, što kiroŭcam nichto ź inšych źniavolenych nie byŭ pracaŭładkavany, bo nie adpaviadajuć patrabavańniam najmalnika. 

Juryj Rubcoŭ udakładniaje, ci viadomyja adroźnieńni praviłaŭ pryjomu dla asudžanych i volnanajomnych? Śviedka kaža, što niama adroźnieńniaŭ, akramia pytańnia zvalnieńnia. A pracoŭnyja adnosiny rehulujucca pracoŭnym zakanadaŭstvam pamiž najmalnikam i asudžanym.

Sud udakładniaje, ci jość mahčymaść pražyvać pa miescy pracy? Śviedka tłumačyć, što zakon nie zabaraniaje stvareńnie filijałaŭ i nie vyklučajecca takaja mahčymaść. Načalnik papraŭčaj ustanovy adkrytaha typu i jaho namieśnik chacieli syści z suda, ale Rubcoŭ vystupiŭ suprać.

Vystupaje śviedka Jarmašuk, načalnik atrada pa arhanizacyi papraŭčaha pracesu. Rubcoŭ tłumačeńni piśmovyja nie davaŭ, pry pastanoŭcy na ŭlik adrazu zajaviŭ, što nie źbirajecca padpisvać nijakich dakumientaŭ.

Replika Rubcova: Kali ja abaviazany pracavać pa nakiravańni, čamu vy nie vydajecie zahadu ab pracaŭładkavańni, jaki rehistrujecca? Sudździa pytajecca ŭ śviedki: ci možacie jamu zahadać pryniać prapanovu? Na padstavie čaho vy ŭžyvajecie da jaho dyscyplinarnyja spahnańni? «Na padstavie nakiravańnia». Ale heta nie moža być padstavaj dla dyscyplinarnych spahnańniaŭ, - kaža sudździa.

11-20. Śviedka Stelmach adsutničaje, nie było pozvu ŭ sud. Apytvajuć Kasienčuka Uładzimira, starejšaha pa nahladzie za vykanańniem pakarańniaŭ.

Śviedka Kasiančuk kaža, što Rubcoŭ admaŭlaŭsia ad prapanavaj pracy, bo jaho nie zadavalniaŭ zarobak. Jon zhadaŭ, što zarobak, jaki prapanavali Rubcovu, byŭ 4,5 miljony rubloŭ. Rubcova, darečy, vazili pracaŭładkoŭvać u palikliniku, adnak hetaha epizodu niama ŭ materyjałach spravy.

Śviedka-inśpiektar pa pracaŭładkavańni kaža, što asudžany abaviazany pracavać, što jon dabraachvotna prajšoŭ miedkamisiju. Inśpiektar śćviardžaje, što Rubcoŭ asabista padavaŭ dakumienty na pracu, ale zajava i pracoŭny dahavor majuć roznyja daty.

Prakuror prosić zanieści zaŭvahu Rubcovu za parušeńnie paradku ŭ sudovym pasiadžeńni ŭ pratakoł. Sudździa pakul nie vynosiŭ zaŭvahi Rubcovu pa prośbie prakurora.

Vyklikali śviedku asudžanaha Rubiela, kaža adnosiny z Rubcovym narmalovyja, što razam jeździli pracaŭładkoŭvacca, adnak zarobak prapanavali mizerny. Inśpiektar pa kadrach tłumačyć, što ŭ pracoŭnym dahavory pakazanaja taryfnaja staŭka, a zarobak bolšy. Aŭtobus u arhanizacyju vyjazdžaje ŭ 8.30, a nazad aŭtobus jedzie ŭ 17-00, tamu mahčymaść prajezdu ad miesca pracy i da miesca načlehu.

Śviedka Viktar Jančuk padćviardžaje pakazańni, dadzienyja pad čas śledstva. Śviedčyć, što byŭ śviedkam, jak Rubcovu prapanoŭvali pracu, ale tam byŭ nizki zarobak. Kaža, što papiaredžvali ab adkaznaść za ŭchileńnie ad pracy. Jon taksama paćvierdziŭ, što Rubcoŭ admoviŭsia ad pracy 5-ha studzienia: «Admoviŭsia z-za taho, što nie zadavoliŭ zarobak». Skazaŭ, što nikoli nia čuŭ ad Rubcova, kab toj kazaŭ, što «kateharyčna admaŭlajecca pracavać». Paćvierdziŭ, što Rubcoŭ aburaŭsia tym, što prymušajuć pracavać za nizkija zarobki.

Śviedka Pavieł Danos taksama asudžany, pracuje ŭ AA «Pružanskaje». Kaža, što z-za admovy pracavać Rubcovu abviaścili vymovu. Rubcoŭ udakładniaje, što nie admaŭlaŭsia kateharyčna. Śviedka Alaksiej Alechnik kaža, što Rubcoŭ prasiŭ pracu z zarobkam u 600 dalaraŭ.

Śviedka Kachnovič niazhodny z pavodzinami Rubcova. Kaža, što znachodziŭ ź im ahulnaj movy. U materyjałach spravy pakazana, što było pry im nakładziena spahnańnie na Rubcova, ale śviedka śćviardžaje što pry im nie było. ŚviedkaUładzimir Majsiejevič kaža, što admaŭlaŭsia Rubcoŭ nie ad pracy, a ad małoha zarobku. Uładzimir Kuchmar i Siarhiej Laščuk taksama śviedčać pra vyniasieńnie papiaredžańniaŭ Rubcovu. Kali prapanujuć pracu, to čamu admaŭlacca, - kaža śviedka.

Da śviedki Jarmašuka ŭ Rubcova paŭstali pytańni. Jon taksama choča chadajničać ab tym, kab było razhledžana pytańnie i ab zakonnaści vyniasieńnia spahnańniaŭ.

12:45. Vysłuchany ŭsie śviedki, akramia dvuch - Słabady inśpiektara pa kadrach pradpryjemstva «Linoŭskaha», dzie prapanavali pracavać Rubcovu i Stelmacha, supracoŭnika śpieckamiendatury №7. Rubcoŭ nastojvaje na vykliku śviedkaŭ Słabady i Ilkieviča (susieda pa pakoi) ŭ sudovaje pasiadžeńnie. Sud ličyć, što treba vyklikać Stelmacha, bo jon staviŭ na ŭlik Rubcova. U sudzie abvieščany pierapynak da 15 hadzin.

Pierapynak zaviaršyŭsia. Prakuror Zajcava źviarnułasia da sudu, kab vydalić Viniarskaha i Kołasa z sudovaj zali za majki z nadpisam «Łukašenka sychodź!» Sudździa nie vydaliŭ.

Vystupaje śviedka inśpiektar pa kadrach Iryna Słabada. Raspaviadaje pra toje, što Rubcoŭ zajavu na pracu napisaŭ, z damovaj aznajomiŭsia, ale nie padpisaŭ. Adnak zajava była padpisana 16 sakavika.

Jana kaža, što prapanavanaja praca pačynałasia z 8 hadzin da 16-00, a raniej śviedki kazali, što aŭtobus, jaki padvozić pracoŭnych, vyjaždžaje ŭ 8-30.

Dapytvajuć Dzianisa Stelmachova, pamočnika načalnika ŭstanovy adkrytaha typu, Aleha Ilkieviča, jaki ŭ Kuplinie žyvie ŭ adnym pakoi z Rubcovym. Jon uładkoŭvaŭsia na pracu ŭ toj ža samy dzień, što i Rubcoŭ. Nakiravańnie na pracu im vydavali ŭ adzin dzień z Rubcovym, da 13 sakavika. Im abodvum vydali nakiravańni. Śviedka padpisaŭ svaju damovu, ale tołkam ničoha nie bačyŭ, tolki čuŭ što Rubcoŭ nie chacieŭ pracavać mienš čym za 600 dalaraŭ.

15.40. Sud pradstaviŭ słova Juryju Rubcovu. Palitviazień adznačyŭ, što śviedki nie kažuć, što jon admaŭlaŭsia pracavać zusim. Jon chacieŭ pracy z zarobkam, pra jaki kazaŭ Łukašenka — 600 dalaraŭ u miesiac. Ale takoj pracy jamu nie dali, bo jaje niama.

16.10. Prakuror adznačyŭ recydyŭ naŭmysnaha złačynstva i prosić pakarać Rubcova 2,5 hoda kałonii, dadać niepahašany termin i ŭ ahulnaj składanaści - 3 hady kałonii ahulnaha režymu.

Pačalisia sprečki bakoŭ. Abaronca kaža, što Rubcoŭ nie piarečyŭ suprać pracaŭładkavańnia, jon atrymaŭ nakiravańnie na pracu, a zatym na miedkamisiju i paśpiachova jaje prajšoŭ. Pry padpisańni dahavora źviarnuŭ uvahu na niezapoŭnienyja pali ŭ pracoŭnym dahavory, u pryvatnaści infarmacyju ab premijach, nadbaŭkach. Tamu abaronca ličyć, što damova była nienaležna aformlenaja. Taksama advakat prosić sud źviarnuć ŭvahu na daty.13 i 16 sakavika, jak śćviardžaje Rubcoŭ ŭ piatnicu nichto nie pracavaŭ, a zatym paŭtorna jany byli pryviezienyja na pracaŭładkavańnie 16 sakavika ŭ paniadziełak. Dalej źviartaje ŭvahu na nakiravańnie. Načalnik kazaŭ, što nakiravańnie na pracu było vydadziena 13 sakavika, a inšyja śviedki kažuć, što jano było vydadziena da 9 sakavika. Taksama śviedki śćviardžani pra niemahčymaść padačy skarhaŭ i niepravamocnyja spahnańni.

Adnak sudździa apielavaŭ tym, što sprava niepadviedamstviennaja sudu.

Nie dakazana ŭ sudzie, što Rubcoŭ mieŭ namier na ŭchileńnie ad pracaŭładkavańnia, što padćviardžajecca prachodžańniem miedkamisii.

Sud adchilaje rašeńnie mižnarodnych arhanizacyj, ale abaronca akcentuje ŭvahu na tym fakcie, što Rubcoŭ pryznany palitviaźniam. Advakat prasiŭ dałučyć da spravy rašeńni mižnarodnych pravaabarončych arhanizacyjaŭ ab pryznańni Rubcova palitviaźniem i prasiŭ ahałasić heta ŭ sudzie. Prakuror vystupiła suprać, bo «Rubcoŭ abvinavačvajecca ŭ złačynstvie suprać pravasudździa». Advakat nastojvaje, kaža, što heta tyčycca asoby abvinavačanaha. Sudździa admoviŭ, bo heta, maŭlaŭ, nia tyčycca spravy.

Jon prosić źviarnuć uvahu na stanoŭčuju charaktarystyku na Rubcova z raniejšaha miesca pracy.

Advakat prosić vynieści apraŭdalny prysud u suviazi z adsutnaściu składa złačynstva, a ŭ vypadku pryznańnia viny ŭličyć dovady i pryznačyć minimalny termin.

Rubcoŭ pramaŭlaje apošniaje słova. Jon havoryć ab tym, što aficyjna pracuje z 16 hadoŭ, a nieaficyjna z 12-ci. Jamu nivodnaha razu na ruki nie vydavali nakiravańnia na pracu, a prosta zabirali i vieźli ŭ niejkuju haspadarku. Milicyjant patrabavaŭ padpisvać nibyta dobraachvotnuju damovu. Taksama jon paviedamiŭ, što jamu pahražali turmoj, kali nie pahodzicca na pracu. Rubcoŭ chacieŭ dać dadatkovyja tłumačeńni pra svaje pohlady, ale sudździa jaho spyniŭ.

Prysud pa spravie Juryja Rubcova budzie ahałošany zaŭtra, 28 maja, da 15:30.

***

Pavialičyć

8 krasavika, kali Juryja Rubcova źmiaścili ŭ śledčy izalatar pavodle hetaha abvinavačańnia, jon abviaściŭ haładoŭku pratestu. Z taho času Rubcova naviedali advakat i medyki. Pavodle advakata, Juryj značna schudnieŭ, ale zachoŭvaje badzioraść i žadańnie zmahacca na sudzie, bo nie pryznaje siabie vinavatym.

Uvosień 2014 hoda Juryj Rubcoŭ atrymaŭ 1,5 hoda «chimii» za abrazu sudździ. Incydent zdaryŭsia paśla Čarnobylskaha šlachu. Na šeście, jakoje prachodziła ŭ Minsku, Juryj Rubcoŭ pryjechaŭ admysłova z Homiela, a padčas šeścia na im była majka z nadpisam «Łukašenka sychodź». Paśla šeścia Juryja Rubcova zatrymali milicyjanty. Praz dva dni jaho pryvieźli ŭ Saviecki rajonny sud biez majki — hołym pa pojas. Za toje, što sudździa Kirył Pałulech pahadziŭsia sudzić jaho ŭ takim vyhladzie, Jury Rubcoŭ nazvaŭ sudździu słovam, jakoje Centralny rajonny sud Minska pryznaŭ abrazaj.

• 0
• 0
• 0
• 0
• 0
• 0
• 0
• 0