Siońnia, 3 červienia, u Łatvii projduć vybary prezidenta, tut jaho abiraje parłamient. Udzielničajuć čaćviora kandydataŭ: vyłučany Sajuzam «zialonych» i sialan Rajmand Viejonis, pradstaŭnik Nacabjadnańnia, sudździa JESPČ Ehił Levits, Siarhiej Dałhapołaŭ (prarasijskaja «Zhoda») i Marcińš Bondars (Łatvijskaje abjadnańnie rehijonaŭ).
Ciapierašni kiraŭnik dziaržavy Andrys Bierzińš zmahacca za svajo pieraabrańnie admoviŭsia.
Parłamient źbiarecca na pazačarhovaje pasiadžeńnie ŭ 10:00. Adzin z kandydataŭ pavinien atrymać padtrymku bolšaści (51 z 100) deputataŭ. Kali ž u pieršym tury hałasavańnia nivodny z kandydataŭ nie nabiare nieabchodnaj dla abrańnia kolkaści hałasoŭ, to, zhodna z rehłamientam Sojma, pravodzicca jašče adno hałasavańnie. Kali i tady nichto nie budzie abrany, to pačynajecca «hulnia na vyžyvańnie» — raz za razam buduć vyklučać samaha niepapularnaha (jaki atrymaŭ mienš za ŭsio hałasoŭ) kandydata.
Prahnazujecca, što padčas pieršaha hałasavańnia mienš za ŭsio hałasoŭ nabiare Marcińš Bondars.
Najbolnyja šancy — u ministra abarony, i byłoha ministra navakolnaha asiarodździa (jon pavodle adukacyi bijołah) Rajmanda Viejonisa. Cikava, što pa maci jon — ruski, dyj naradziŭsia ŭ Pskoŭskaj vobłaści.
Ale Viejonis vystupaje za bolš ciesnaje supracoŭnictva z Zachadam i maksimalnuju intehracyju z NATA. Viejonis nieadnarazova vykazvaŭ zakłapočanaść aktyvizacyjaj Rasii na ŭschodniaj miažy.
Choć kaalicyja nie zmahła damovicca pra adzinaha kandydata na pasadu prezidenta, prahnazujecca, što Viejonis maje bolš šancaŭ być abranym na hetuju pasadu, čym ekśpiert pa pravie Ehił Levits.
Rola prezidenta Łatvii apošnim časam mocna vyrasła.
U łatvijskim hramadstvie, asabliva paśla padziej va Ukrainie, nieadnarazova havaryłasia pra toje, što prezident pavinien być bolš mocnaj fihuraj, jakaja ŭ vypadku fors-mažoru pavinien uziać los Łatvii ŭ svaje ruki.
Taksama viadomy prykład Vałdzisa Zatlersa, jaki ŭ 2011 h. inicyjavaŭ rospusk parłamienta.
Prezident Łatvii taksama moža inicyjavać zakonaprajekty abo viartać u parłamient, kali ličyć ich niedpracavanymi.
Kamientary