Nie tak daŭno ŭ internecie nabyła vialikuju papularnaść akcyja litoŭskich mastačak, pra jakuju ŭžo pisała «Naša Niva» — ślaźlivyja partrety tych litoŭskich mužčyn, jakija nie chočuć słužyć u vojsku, jak reakcyja na ŭviadzieńnie abaviazkovaj słužby ŭ Litvie.
Liha abarony Estonii (Kaitseliit) zładziła adkaz na hetuju akcyju. Jon ujaŭlaje saboj partrety mužčyn i žančyn roznych zaniatkaŭ i prafiesij, jakija słužać dobraachvotnikami.
Estoncy źviarnulisia da svaich bałtyjskich susiedziaŭ z nastupnym tekstam:
«Pavažanyja litoŭskija siabry,
Vašy 14 mocnych partretaŭ mužčyn, jakija vykazvajuć svaje pačućci ŭ adnosinach da terminovaj słužby, akazalisia nasamreč vielmi mocnymi, ale, mahčyma, nie takim čynam, jak vy płanavali.
My abodva maleńkija, svabodalubnyja narody, jakija žyvuć u niebiaśpiečnym susiedstvie. Tolki naša rašučaść, naša luboŭ da svabody i našaha ładu žyćcia, našaha doma i blizkich mohuć adstajać mir i svabodu dla nas i našych dziaciej.
Dla hetaha važna być hatovym rašuča abaraniać našu svabodu.
Liha abarony Estonii źjaŭlajecca dobraachvotnaj vajennaj arhanizacyjaj, jakaja składajecca ź ludziej, jak ja i ty, ludziej, jakija vyrašyli vydatkavać častku svajho času na słužeńnie svajoj krainie. My vučymsia i trenirujemsia, kab potym źniać našy mundziry i praciahnuć naša žyćcio jak nastaŭniki, kiroŭcy, jurysty, architektary i h.d. My ličym, što lepšym adkazam na siły, jakija hruntujucca na strachu i ahresii, źjaŭlajecca dobraja padrychtoŭka, a zatym užo možna pierachodzić da našaha zvyčajnaha žyćcia.
My zrabili hetyja 16 partretaŭ, kab padtrymać vas i skazać: vy nie pavinny być vialikim śpiecyjalistam pa ŭzbrajeńni, vam nie treba dakazvać svaju mužnaść, šturmavaja vintoŭka abo hranatamiot nie pavinny vielmi vam padabacca.
Vy prosta pavinny lubić svabodu!
Łaŭry i Kaŭpa,
ad imia našych siabroŭ, hramadzian Estonii i siabroŭ Lihi abarony».
Liha abarony Estonii dziejničaje z 1918 hoda. Na ciapierašni momant heta dobraachvotnaja vajenizavanaja arhanizacyja, jakaja ŭvachodzić u skład Siłaŭ abarony Estonii. Arhanizacyja maje taksama žanočaje i dziciačaje adździaleńnie. Ahulnaja kolkaść siabroŭ naličvaje kala 20 tysiač čałaviek.
Ciapier čytajuć
«Kaleśnikava kaža, što nie źbirajecca vychodzić, pakul nie vyjdzie apošni z palitviaźniaŭ»30
«Kaleśnikava kaža, što nie źbirajecca vychodzić, pakul nie vyjdzie apošni z palitviaźniaŭ»
«Svoj nos ź Biełastoka jany nie vysoŭvajuć». Biełarusy Padlašša skardziacca, što biełarusy novaj chvali emihracyi nie zacikaŭlenyja supolnymi spravami3131
Kamientary