Siarhiej Bryn. Fota: latimes.com
Suzasnavalnik i prezident pa technałahičnych raspracoŭkach Google, 41-hadovy Siarhiej Bryn raźvioŭsia z suzasnavalnicaj i hiendyrektaram 23andMe, jaho ravieśnicaj En Vujcickaj, paviedamlaje Business Insider. Razvod byŭ cicha praviedzieny ŭ sudzie Santa-Kłary (Kalifornija, ZŠA) 1 maja 2015 hoda.
Vujcicka naradziła Brynu syna Bendžy ŭ 2007-m i dačku ŭ 2011-m (jaje imia nie nazyvałasia). Jany ŭsio jašče vychoŭvajuć dziaciej razam, chacia žyvuć u roznych damach pa susiedstvie.
Siarhiej Bryn i En Vujcicka. Fota: telegraph.co.uk
Bryn i Vujcicka ažanilisia ŭ 2007 hodzie na Bahamach. Jaje startap 23andMe zajmaŭsia (i zajmajecca) zboram infarmacyi pra stan zdaroŭja i mahčymyja zachvorvańni pa vynikach hienietyčnych testaŭ. Jaho, na toj momant užo miljardera i adnoha ź lidaraŭ IT-hihanta Google, zacikavili padobnyja daśledavańni. Razam para zajmałasia klučavymi prablemami prajektu «Čałaviečy hienom», Google niamała inviestavaŭ u 23andMe. Kažuć, da niepažadanych mutacyj u hienietyčnym kodzie Bryn staviŭsia jak da bahaŭ u kodzie prahramnym.
Para faktyčna raspałasia ŭ 2013 hodzie — z taho času jany pačali žyć asobna, chacia zastalisia siabrami i partniorami pa biźniesie. Užo tady paviedamlałasia (a ciapier paćvierdziłasia), što para zaklučyła šlubny kantrakt, pavodle jakoha doli Bryna ŭ Google (na siońnia 16%, jak i ŭ Łary Pejdža) ničoha nie pahražaje. Siastra En Vujcickaj, Siuzan, zastałasia na pasadzie hiendyrektara Youtube, što ŭvachodzić u aktyvy Google.
Amanda Rozienbierh i Chjuha Bara. Fota z asabistaj staronki Rozienbierh na Google+
Dakładnyja pryčyny raspadu pary nieviadomyja, ale chodziać šmatlikija čutki pra słužbovy raman Bryna z žančynaj u akularach. Tymi akularami byli Google Glass — razumnyja akulary-kampjutar Google, a toj žančynaj — maładziejšaja za 30 mieniedžar pa ich (akularaŭ) markietynhu Amanda Rozienbierh.
Heta žorstka, ale śćviardžajuć, što Rozienbierh była siabroŭkaj Vujcickaj. Da taho ž, Rozienbierh kinuła dziela Bryna svajho chłopca, jaki pry hetym byŭ adnoj z klučavych fihur u prajekcie Android, paśpiachovaj apieracyjnaj sistemie Google. Hety chłopiec, brazilec Chjuha Bara, paśla hetaha pakinuŭ Google i syšoŭ da kitajskaha telefonnaha hihanta Xiaomi. U biźniesie Bara siońnia ŭsio dobra (Xiaomi stali lidarami na mabilnym rynku Kitaja), a voś na pracy Rozienbierh nie ŭsio hładka (vytvorčaść akularaŭ prypynienaja, prajekt «pierazahruziać»).
Nikol Šanachan. Fota: gnossem.tumblr.com
Bryna i Rozienbierh daŭno nie bačyli razam — kažuć, para razyšłasia i Bryn časova viarnuŭsia da žonki. Ale spadziavacca na ruku i serca miljardera i fiłantropa nie varta: niadaŭna jon byŭ zaŭvažany ŭ ciesnych adnosinach z 38-hadovaj Nikol Šanachan, zasnavalnicaj patentnaj kampanii ClearAccessIP. Pra ich adnosiny viadoma mała, chacia ŭžo chodziać čutki pra chutkaje viasielle.
***
Siarhiej Bryn naradziŭsia ŭ 1973 hodzie ŭ Maskvie (Rasija) ŭ jaŭrejskaj siamji matematykaŭ. Siamja pierajechała ŭ ZŠA, kali jamu było 5 hod (za što jon udziačny baćkam). Daterminova atrymaŭ dypłom bakałaŭra ŭ Meryłendskim univiersitecie, dypłom mahistra atrymaŭ užo ŭ Stenfardzie. Jašče padčas vučoby cikaviŭsia pošukavymi mašynami. Razam z Łary Pejdžam zasnavaŭ pošukavik Google ŭ 1998 hodzie — pieršapačatkova jany pracavali nad pošukavikam dla kampusu Stendfardskaha univiersiteta. U 2004-m źjaviŭsia ŭ śpisie miljarderaŭ Forbes, siońnia zajmaje ŭ im 20 miesca z 29,1 młrd dalaraŭ u kišeni.
