Pieśnia mahiloŭska-pieciarburhskaha hurtu IOWA nabrała 10,2 młn prahladaŭ na Youtube.
Samym prahladalnym klipam siarod videa biełaruskich artystaŭ na Youtube staŭ «Ułybajsia» mahiloŭska-pieciarburhskaha hurtu IOWA. Pa źviestkach Afisha.tut.by, u top-5 biełaruskich klipaŭ taksama trapiŭ jašče adzin klip IOWA, dva videa Maksa Karža i fan-videa na pieśniu «Lapisaŭ».
Klip «Ułybajsia» vyjšaŭ u žniŭni 2012 hoda, pieśnia prahučała ŭ šerahu rasijskich sieryjałaŭ i stała adnoj z samych zapatrabavanych na muzyčnym servisie iTunes siarod artystaŭ z SND.
Na druhim miescy pa prahladach — «V tiemnotie» Maksa Karža z 8,4 młn prahladaŭ. Na trecim — «Maršrutka» IOWA (7,9 młn), na čaćviortym — nieaficyjnaje videa na «Voiny śvieta» hurtu «Lapis Trubiacki» (7,6 młn), na piatym — «Motylok» Maksa Karža (7,3 młn).
Biełaruskamoŭnyja pieśni «Lapisaŭ» uvachodziać u dziasiatku ich samych prahladalnych videa. Za «Voinami śvieta» pa papularnaści iduć «Žieleznyj», dźvie viersii «Ja vieriu», amatarskaja narezka na pieśniu «Šut» z kadrami vystupaŭ Janukoviča. Na šostym miescy aficyjny klip na biełaruskamoŭnuju «Nie być skotam» (2 młn prahladaŭ), na siomym — amatarskaja narezka na «Hraj» (1,7 młn).
Samym papularnym videa pa zapycie «Belarus» zastajecca zapis «Blues from old woman», na jakim babula z Homiela hraje bluz niezvyčajnaj technikaj. Samym prahladalnym kanałam ź Biełarusi zastajecca kanał junaha błohiera Dzimy Jarmuzieviča.
***
Hurt IOWA stvorany ŭ Mahilovie ŭ 2009 hodzie. U 2010-m kamanda pierabrałasia ŭ Sankt-Pieciarburh, dzie pracuje i siońnia. Hraje ruskamoŭny pop-rok z elemientami fanku. U 2012 hodzie atrymała Nacyjanalnuju muzyčnuju premiju Respubliki Biełaruś jak «Adkryćcio hoda», u 2015-m na premii «Lira» — pryz «Za papularyzacyju biełaruskaj muzyki za miažoj».
Kamientary