U Minsku masava pradajuć i zakryvajuć kaviarni i restarany

U Minsku masava pradajuć i zakryvajuć kaviarni, bary i restarany: ciapier šukajuć novych uładalnikaŭ abo rychtujucca da zakryćcia bolš jak 100 ustanoŭ. Pra heta havorycca ŭ paviedamleńni kampanij «Zavod Bulbaš'» i «Tvaja stalica», jakija zajmajucca daśledavańniem rynku hramadskaha charčavańnia. 

Na dumku pradstaŭnikoŭ kampanij, u najbližejšyja dva hady Minsk sutykniecca ź pieradziełam restarannaha biźniesu: nievialikija kaviarni i restarany sa słabymi handlovymi markami zakryjucca, a na ich miesca pryjduć viadomyja sietki chutkaha charčavańnia. Užo zaraz niedastatkova raskručanyja ŭstanovy zaviaršajuć pracu, a na rynak vychodziać mižnarodnyja brendy — Burger King, KFC, Hesburger. Pry hetym aktyŭna pašyrajuć svaje sietki ŭžo pradstaŭlenyja ŭ krainie apieratary, takija jak McDonald's. 

Jak adznačajuć ekśpierty, masavy prodaž abjektaŭ hramadskaha charčavańnia dasiahnuŭ piku ŭ červieni hetaha hoda. Asnoŭnaja pryčyna — spad pakupnickaj zdolnaści: źnižajecca jak kolkaść naviedvalnikaŭ, tak i siaredni ček. Pry hetym daražejuć pradukty charčavańnia, rastuć zarpłaty kucharaŭ i aficyjantaŭ. Z-za niedastatkova vysokaj kolkaści naviednikaŭ niekatoryja abjekty hramadskaha charčavańnia nie mohuć pakryć arendnyja staŭki, havorycca ŭ paviedamleńni. 

Pavodle acenak TAA «Zavod Bulbaš'», mnohija restarany ŭ Minsku hatovyja źmianić uładalnikaŭ, a siarod piciejnych ustanoŭ paśpiachova pracujuć pryblizna pałova. «Novyja ŭstanovy ŭ Minsku adkryvajucca časta, adnak mnohija ź ich i chutka zakryvajucca. Adbivajecca jak deficyt naviednikaŭ, tak i adsutnaść aryhinalnych kancepcyj», — ličyć dyrektar pa markietynhu handlovaj marki «Bulbaš'» Andrej Butoŭski. 

«U jeŭrapiejskich haradach abjekty hramadskaha charčavańnia šmat u čym isnujuć za košt turystaŭ, u Minsku patok turystaŭ značna mienšy. Što da miascovych žycharoŭ, to, chacia kultura spažyvańnia pa-za domam aktyŭna raźvivajecca, jana značna nižejšaja, čym, skažam, u Paryžy, Prazie abo Bierlinie. Minsku nie chapaje demakratyčnych kaviarniaŭ z dastupnymi cenami i stravami składaniejšymi za picu i hamburhier. Ustanovy ź biełaruskaj kuchniaj i zusim možna pieraličyć pa palcach», — padkreśliŭ ekśpiert. 

Na jaho dumku, «u kančatkovym liku vyžyvuć tyja, chto pravilna vybraŭ farmat, pierajšoŭ na pravilnuju cenavuju palityku, efiektyŭna naładziŭ łahistyku i pabudavaŭ mocny brend». «Heta tyčycca jak mižnarodnych sietak, tak i biełaruskich apierataraŭ, jakim udałosia znajści svajo miesca na rynku i štości supraćpastavić suśvietnym handlovym markam», — padkreśliŭ Butoŭski. 

Pry hetym, adznačyŭ jon, na rynku ŭsio jašče jość volnyja nišy, a najbolšyja pierśpiektyvy nazirajucca ŭ sietak chutkaha charčavańnia, aryjentavanych na ludziej ź siarednim i nizkim dastatkam. «Ale navat im nie varta raźličvać na rost prybytku — u ciapierašnich umovach bolš važna pavialičyć svaju dolu na rynku, jak heta robiać mižnarodnyja brendy», — ličyć jon. 

Jak adznačyŭ kiraŭnik prajektaŭ pa handlovaj nieruchomaści «Tvaja stalica. Nieruchomaść dla biźniesu» Dźmitryj Drobyšaŭ, u Minsku pavialičvajucca volnyja płoščy pad abjekty hramadskaha charčavańnia, a arendnyja staŭki z pačatku hoda źnižajucca. «Znajści pamiaškańnie ŭ handlovym centry abo žyłym domie dla adkryćcia kaviarni i restarana stała praściej. Ułaśniki, jak praviła, hatovyja iści na sastupki, u tym liku ŭstanaŭlivać prymalnyja staŭki i prapanoŭvać arendnyja kanikuły. Usio heta ŭ siarednieterminovaj pierśpiektyvie dazvolić restarannamu biźniesu ŭzdychnuć bolš svabodna», — ličyć ekśpiert rynku nieruchomaści.

• 0
• 0
• 0
• 0
• 0
• 0
• 0
• 0