Matč Mikranezija — Taici, mikranezijcy ŭ siniaj formie. Fota: oceaniafootball.com
Za try hulni hrupavoha etapu futbolnaha turniru Cichaakijanskich hulniaŭ moładzievaja (U-23) zbornaja Fiederatyŭnych štataŭ Mikranezii nie zabiła nivodnaha hoła, a prapuściła 114 miačoŭ.
Mikranezija prajhrała Taici 0:30, zatym prajhrała Fidžy 0:38, u apošniaj hulni prajhrała Vanuatu 0:46. Heta pieršy ŭdzieł kamandy ŭ mižnarodnym turniry.
Paraza ŭ hulni z Vanuatu — absalutny rekord suśvietnaha futbołu. Papiaredni rekord naležyŭ Amierykanskamu Samoa — u 2001 hodzie jany prajhrali Aŭstralii 0:31. Ale novy rekord naŭrad ci budzie aficyjna pryznany — Mikranezija nie jość siabram FIFA.
Suśvietnyja ŚMI adzinahałosna nazvali mikranezijskuju kamandu «najhoršaj zbornaj śvietu». The Daily Mirror zapuściła žartaŭlivaje apytańnie: «Ci zmahli b vy trapić u zbornuju Mikranezii?» z varyjantami adkazaŭ «Tak», «Absalutna», «Dakładna» i «Viadoma».
«Heta chłopčyki, nie mužčyny, — skazaŭ trenier Sten Foster pra svaju kamandu. — I jany hulali suprać dobra padrychtavanych mužčyn. Spadziajusia, bolšaja častka hetych chłopčykaŭ zastaniecca tut prynamsi na vosiem hod».
Tym nie mieniej, trenier kamandy ličyć heta paśpiachovym debiutam kamandy, jon źviarnuŭsia da FIFA z prośbaj ab aficyjnym pryznańni zbornaj i ŭklučeńni jaje ŭ Azijackuju kanfiederacyju, što adkryje šlach da techničnaj dapamohi kamandzie. Na nastupnyja Cichaakijanskija hulni praz čatyry hady kamandu ŭžo paabiacali zaprasić.
***
Fiederatyŭnyja štaty Mikranezii — nievialikaja dziaržava na 607 nievialikich astravach i vyspach u Akijanii. Atrymali niezaležnaść ad ZŠA ŭ 1986 hodzie, zastajucca z ZŠA ŭ svabodnaj asacyjacyi. Na płoščy ŭ 702 kvadratnych kiłamietry pražyvajuć 106 tysiač čałaviek. Pa ŭzroŭni VUP znachodziacca na 207 miescy z 227, ekanomika trymajecca na naturalnaj sielskaj haspadarcy, rybnaj łoŭli i padtrymcy ZŠA.
