28 lipienia ŭ Nacyjanalnym histaryčnym muziei Biełarusi adkryjecca vystavačny prajekt «Vialikaja prezientacyja muziejnych relikvij «79 prystupak uhłyb historyi».
«U dvuch vystavačnych załach my sabrali zvyš za dźvie tysiačy muziejnych pradmietaŭ sa svaich dvaccaci kalekcyj, — raspavioŭ dyrektar muzieja Aleh Ryžkoŭ. — Prajekt prymierkavany da vychadu ŭ śviet vialikaha ilustravanaha alboma «Nacyjanalny histaryčny muziej Respubliki Biełaruś». Tak my vyrašyli paznajomić šyrokuju publiku z tym, što źbiraje, vyvučaje i zachoŭvaje naš muziej.
Niesumnieŭnuju cikaŭnaść naviedvalnikaŭ vykličuć redkija dakumienty pieršaj pałovy XIX st., hrašovyja znaki časoŭ paŭstańnia pad kiraŭnictvam Tadevuša Kaściuški. Sa staradaŭnich hieahrafičnych kart budzie pradstaŭlenaja karta Minskaj hubierni 1800 hoda. Niamała takich ekspanataŭ, jakija publika ŭbačyć ŭpieršyniu, naprykład, mandalinu pracy italjanskich majstroŭ dvuchviekavoj daŭniny.
«Dumaju, nivodnaja žančyna nie projdzie mima vitryn, u jakich my vystaŭlajem lusterka firmy «K. Fabierže» i ruskija kakošniki kanca XVIII st., — adznačyŭ dyrektar muzieja. — Na vystavie pradstaŭlenyja redkija muzyčnyja instrumienty, antyčnyja maniety, a taksama kalekcyi hadzińnikaŭ, miedaloŭ, mebli… U poŭnym abjomie ekspanujecca kalekcyja słuckich pajasoŭ i ich frahmientaŭ. Bolšaść pradmietaŭ adnosicca da tak zvanaha daindustryjalnaha hramadstva, jany sahretyja rukami majstroŭ…
Na adkryćcio vystavačnaha prajekta zaprošanyja ŭsie, chto mieŭ dačynieńnie da vydańnia ilustravanaha alboma «Nacyjanalny histaryčny muziej Respubliki Biełaruś». Heta historyki, navukoŭcy, afarmicieli, a taksama partniory z AAT «Pryorbank», jaki akazaŭ muzieju finansavuju padtrymku.
Kamientary