U milicyju ad słužby «103» pastupiła infarmacyja pra toje, što 38-hadovamu mužčynu z nažavym ranieńniem brušnoj połaści była akazana dapamoha. Pa słovach paciarpiełaha, traŭmu jamu nanios nieviadomy mužčyna, jakoha jon padvoziŭ na aŭtamabili.
Milicyjantam paranieny kiroŭca raspavioŭ, što pracuje načalnikam učastka na adnym z budaŭničych pradpryjemstvaŭ. Pieryjadyčna zajmajecca pryvatnym voźnictvam. Na adnoj z vulic da jaho ŭ aŭtamabil padsieŭ mužčyna, jaki zaniaŭ piaredniaje pasažyrskaje siadzieńnie. Padčas ruchu ŭ sałonie vypadkova adkryŭsia bardačok, u jakim znachodzilisia hrošy (pryblizna 38 miljonaŭ biełaruskich rubloŭ), jakija pryznačalisia dla vypłaty zarabotnaj płaty rabotnikam pradpryjemstva. Pasažyr, zaŭvažyŭšy heta i ni słova nie skazaŭšy, uziaŭ vialiki kuchonny nož, jaki lažaŭ u pahłybleńni dźvierki aŭto, i nanios im udar u žyvot kiroŭcu, paśla čaho zabraŭ usie hrošy z bardačka i źbieh.
Adnak padčas praviadzieńnia dalejšych apieratyŭna-vyšukovych mierapryjemstvaŭ pakazańni paciarpiełaha byli pastaŭleny pad sumnieŭ. Było ŭstanoŭlena, što nijakaha razbojnaha napadu nasamreč nie było. Mužčyna, vyrašyŭšy prysvoić hrašovyja srodki, schavaŭ ich, a kab advieści ad siabie padazreńnie — insceniravaŭ zamach na samoha siabie. Dla praŭdapadobnaści navat nanios sabie nažavoje ranieńnie, paviedamlaje pres-słužba HUUS Minharvykankama.
«Pry zvarocie hramadzian u orhany ŭnutranych spraŭ z zajavaj ab złačynstvie supracoŭniki milicyi ŭ abaviazkovym paradku papiaredžvajuć ich ab kryminalnaj adkaznaści ŭ adpaviednaści z artykułam 400 («Zahadzia iłžyvy danos») Kryminalnaha kodeksa Respubliki Biełaruś, — rastłumačyŭ načalnik kryminalnaj milicyi Centralnaha RUUS Minska Andrej Apanasievič. — U hetym ža vypadku, kali dziejańni mužčyny buduć kvalifikavanyja pa častcy 2-j dadzienaha artykuła, jamu moža pahražać da piaci hadoŭ pazbaŭleńnia voli».
