U Minsku piensijaniera zatrymali za toje, što jon prynosiŭ zborščykam podpisaŭ za Labiedźku marožanaje FOTA
29 lipienia kala HUMa ŭ Minsku zatrymali viadomaha biełaruskaha muzyku i piśmieńnika Leanida Zubarava. Jak patłumačyŭ u kamientary sajtu minskby.com Leanid Iosifavič, jaho aryštavali za toje, što jon «padkormlivaŭ» pikietoŭcaŭ AHP marozivam.
Jak raspavioŭ piśmieńnik, da jaho padyšli supracoŭniki AMAPu paśla taho, jak jon prynios dvum zborščykam podpisaŭ za Anatola Labiedźki maroziva. Supracoŭniki AMAPu abvinavacili piśmieńnika ŭ tym, što jon łajaŭsia matam i prapanavali prajści razam ź imi. Kali Zubaraŭ admoviŭsia, jamu załamali ruki na vačach u ŭsich i advieźli ŭ pastarunak.
Leanid Iosifavič raspavioŭ, što ŭ pastarunku ŭ jaho zapatrabavali dakumienty, adnak ich z saboj nie akazałasia. U adkaz na heta piśmieńnik paraiŭ supracoŭniku milicyi aznajomicca ź jaho bijahrafijaj na aficyjnaj staroncy ŭ Vikipiedyi. Paśla taho, jak aficer ŭbačyŭ fatahrafiju piśmieńnika i daviedaŭsia ab najaŭnaści hramadzianstva ZŠA, Leanida Iosifaviča adpuścili
«Jak ja razumieju, jany aryštavali mianie prosta za toje, što ja prynios pikietoŭcam maroziva. Akramia taho, amapaŭcy, jakija pryvieźli mianie ŭ pastarunak, vidavočna nie viedali, chto ja taki, u adroźnieńnie ad aficera, jaki vyvučaŭ maju bijahrafiju na Vikipiedyi. Adrazu paśla hetaha jon vyhnaŭ supracoŭnikaŭ, jakija pryvieźli mianie, niahledziačy na toje, što tyja pačali vinavacić mianie ŭ niecenzurnaj łajancy i znachodžańni ŭ pjanym vyhladzie ŭ hramadskim miescy, i adpuściŭ mianie. Adzinaje, što mianie vyratavała ad 15 sutak, — hramadzianstva ZŠA, jakoje daje peŭnuju abaronu», — tak prakamientavaŭ svajo zatrymańnie Leanid Zubaraŭ.
Leanid Zubaraŭ — biełaruski piśmieńnik, aŭtar mastacka-dakumientalnych apovieściaŭ, ramanaŭ, paem, tvoraŭ dla dziaciej i junactva na ruskaj, anhlijskaj i biełaruskaj movach. Jon kiravaŭ arkiestram narodnaj muzyki i VIA «Błukajučyja zorki». Z 1990 hoda žyvie ŭ ZŠA i Biełarusi. Člen Sajuza piśmieńnikaŭ Biełarusi i vice-prezident «Biełaruskaha Ziamlactva».
Kamientary