«Basovišča-2006»: vyznačanyja asnoŭnyja padrychtoŭčyja terminy

Arhanizatary festyvalu muzyki maładoj Biełarusi «Basovišča-2006» vyznačyli asnoŭnyja padrychtoŭčyja terminy. Maładyja biełaruskija hurty zaprašajucca da ŭdziełu ŭ adboračnym tury, kab pazmahacca za hałoŭny pryz «Basovišča-2006» – zapis alboma ŭ Polščy, a taksama za šerah inšych kaštoŭnych pryzoŭ. A amatary biełaruskaj muzyki mohuć užo paznačać na svaich kalandarykach daty 21-22 lipienia, rychtavać pašparty da atrymańnia polskich vizaŭ, sušyć namioty – rychtavacca da «Basovišča-2006».

Jak paviedamiŭ studenty.by staršynia biełastockaha BAS Radasłaŭ Dambroŭski ŭ hetym hodzie partnerami festyvalu ź biełaruskaha boku jany bačać Creative Community studenty.by, łejbł BMAgroup, internet-partał «Tuzin Hitoŭ». Na dadzieny momant idzie vyznačeńnie funkcyjaŭ u padrychtoŭcy da «Basovišča» hetymi kamandami.

Radek Dambroŭski paviedamiŭ asnoŭnyja daty ŭ padrychtoŭcy festyvalu.

20 traŭnia

Padviadzieńnie vynikaŭ konkursu na lepšy lahatyp da «Basovišča-2006».

28 traŭnia

Da hetaj daty viadziecca pryjom dema-zapisaŭ ad zacikaŭlenych hurtoŭ-udzielnikaŭ, taksama pravodzicca papiaredni adbor hurtoŭ, jakija buduć zaprošanyja na adboračny kancert.

11 červienia

Da hetaj daty planujecca praviadzieńnie adboračnaha kancertu, kančatkovy adbor kankursantaŭ, jakija i pajeduć na «Basovišča-2006» u Haradok (Polšča). U hety ž čas budzie vieścisia internet-hałasavańnie, pavodle jakoha budzie vyznačany jašče adzin hurt, jaki pajedzie na festyval razam z hurtami, abranymi žury na adboračnym kancercie. Śpis haściej festyvalu, «zorak» taksama planujecca vyznačyć da 11 červienia.

1 lipienia

Vyznačeńnie hurtoŭ-udzielnikaŭ «Volnaj sceny» na «Basoviščy-2006». Na hetaj placoŭcy vystupajuć hurty samastojna, biez udziełu ŭ konkursnaj prahramie. Zvyčajna na «Volnaj scenie» vystupajuć hurty-pačatkoŭcy. Dla ŭdziełu ŭ hetaj častcy festyvalu hurty musiać dasłać svoj dema-zapis arhanizataram da 1 lipienia.

Zajaŭka ad hurta na ŭdzieł u konkursnaj prahramie «Basovišča» musić uklučać zapis adnoj (ci bolej) piesień pa-biełarusku na CD-nośbicie. Da taho ž abaviazkovymi ŭmovami źjaŭlajucca najaŭnaść 20-chvilinnaj muzyčnaj prahramy na biełaruskaj movie, a taksama ŭdzielnikai hurta na momant praviadzieńnia adboračnaha kancertu musiać mieć u pašpartoch štampiki z dazvołam na vyjezd za miažu.

Pa słovach Radeka Dambroŭskaha apošniaje patrabavańnie abumoŭlena dośviedam praviadzieńnia papiarednich festyvalaŭ «Basovišča». Bo ŭ minułym hodzie na «Basoviščy» była takaja sytuacyja, što niekatoryja hurty prajšli adboračny tur, ale nia zdoleli trapić niepasredna na festyval, bo nie mahli atrymać vizaŭ z-za adsutnaści štampaŭ u pašpartoch.

Apošnim časam pamiž aktyŭnymi zaŭziatarami «Basovišča» stali častymi razmovy pra muzyčny farmat festyvalu. Radek Dambroŭski kamentuje, što «Basovišča - heta festyval muzyki maładoj Biełarusi, a farmat možna akreślić paniatkam alternatyŭnaj muzyki».

Bližejšymi dniami budzie vyznačany skład žury dla adboračnaha turu i dadzieny start na pryjom dema-zapisaŭ ad hurtoŭ.

Studenty.by

• 0
• 0
• 0
• 0
• 0
• 0
• 0
• 0