Palihon pa źniščeńni jeŭrapiejskich praduktaŭ na miažy Rasii ź Biełaruśsiu. Fota Raśsielhasnahladu.
Uvachod na palihon u Kraśnienskom rajonie Smalenskaj vobłaści, dzie źniščajuć sankcyjnyja pradukty ź Jeŭrasajuza, zabaronieny. Zabaronu ŭviali paśla źjaŭleńnia fotaŭ, jak akuratna adzietyja miascovyja žychary kałupajucca ŭ katłavanie, vybirajučy niedadušany tavar.
Jak paviedamlaje smalenski sajt «Rabočij puť», 8 žniŭnia ŭvachod na palihon začynili šłahbaŭmam, a kala jaho pastavili achoŭnikaŭ.
Miascovyja žychary kažuć, što ŭčora tut było šmat ludziej, «jakija źbirali» niektaryny.
«I na darahich mašynach pryjazdžali, kab sadaviny pajeści. Škada, što ŭsio ŭžo pieračavili», — raspaviała miascovaja žycharka.
Sankcyjnyja pradukty ŭ Rasii pačali źniščać z 6 žniŭnia.
U pryvatnaści, na biełaruska-rasijskaj miažy Raśsielhasnahlad vyjaviŭ i źniščyŭ bolš za 180 ton piersikaŭ, niektarynaŭ, čarešań, vinahradu. Na pradukty byli fitasanitarnyja siertyfikaty, vydadzienyja biełaruskaj arhanizacyjaj pa abaronie i karancinu raślin na padstavie reekspartnych fitasanitarnych siertyfikataŭ Małdovy i fitasanitarnaha siertyfikata krainy pachodžańnia Turcyi. Miž tym ułady Turcyi nibyta paćvierdzili rasijskamu boku, što takich siertyfikataŭ na hetuju pradukcyju nie vydavali.
Tady ž miascovyja žychary ratavali z palihona kiłahramy sadaviny i aharodniny, što nazirali ŭ tym liku žurnalisty biełaruskich ŚMI.
