Sudździa Čyhunačnaha rajsudu Ała Bardziukova skiravała na dapracoŭku pratakoły, składzienyja na apazycyjaneraŭ Alenu Zaleskuju i Barysa Chamajdu, jakija 25 lutaha pravodzili akcyju pamiaci Iryny Kazulinaj.
Milicyjanty zatrymali aktyvistaŭ za raspaŭsiud ulotak sa źviestkami pra śmierć Iryny Kazulinaj i pra toje, što palitviaźnia Alaksandra Kazulina nie puskajuć na pachavańnie žonki. Jany rascanili hetyja dziejańni jak niesankcyjanavanaje pikietavańnie.
Pavodle Aleny Zaleskaj, jakaja była inicyjatarkaj žałobnaj akcyi, sudździa Ała Bardziukova vyrašyła nie razhladać składzienyja milicyjantami pratakoły, bo nia ŭbačyła ŭ hetych materyjałach składu apisanaha pravaparušeńnia. Pratakoły jana zahadała adpravić u RUUS, kab tam ich abo dapracavali, abo ŭvohule źniščyli jak niesapraŭdnyja.
Novaj daty praciahu sudovaha razboru sudździa nie pryznačyła i zapisać adrasy apazycyjaneraŭ, kab paźniej dasłać pozvy, taksama admoviłasia.
Na dumku Barysa Chamajdy, praciahu sudovaha pracesu nia budzie, bo 25 lutaha, kali vyrašałasia pytańnie pra časovaje vyzvaleńnie Alaksandra Kazulina dla ŭdziełu ŭ pachavańni žonki, palityčnaja situacyja ŭ krainie była kudy bolš napružanaja.
Sud byŭ pieraniesieny z taje pryčyny, što Barys Chamajda zapatrabavaŭ pierakładčyka, zajaviŭšy, što nie razumieje dakładna sensu pytańniaŭ sudździ, jakaja razmaŭlaje pa-rasiejsku. Adnak siońnia pierakładčyk užo nie spatrebiŭsia.
