10–13 sakavika ŭ Strasburhu ŭ ramkach čarhovaj siesii Jeŭraparłamienta projduć mierapryjemstvy ŭ honar 90-hodździa abviaščeńnia Biełaruskaj Narodnaj Respubliki pad nazovam «Biełaruski tydzień».
Siarod haściej «Biełaruskaha tydnia» buduć staršynia Jeŭraparłamientu Hans-Hiert Poterynh, kiraŭnik frakcyi Jeŭrapiejskaj narodnaj partyi Džozef Doŭł, kiraŭnik kamitetu pa zamiežnych suviaziach Jacek Saryjuš-Volski.
Jak paviedamili ŭ ofisie inicyjatara hetaha prajektu, kiraŭnika delehacyi pa suviaziach ź Biełaruśsiu, polskaha deputata Jacka Pratasieviča, prahrama ŭklučaje pakaz filmu režysiora Jurja Chaščavackaha «Płošča», vystavy mastakoŭ Alesia Maračkina j Ryhora Sitnicy, fatohrafaŭ Ihara Krašeŭskaha i Adama Tuchlinskaha. Zapłanavany taksama vystup hurtu Źmitra Vajciuškieviča «W-Z Orchestra».
Ciaham tydnia zapłanavanyja dyskusii i sustrečy z pradstaŭnikami biełaruskaj hramadskaści, ich pres-kanfierencyja, a taksama abmien dumkami pa temie «Niezaležnaja Biełaruś – nieadjemnaja častka Jeŭropy». Budzie padnimacca pytańnie, – jakoje łabirujuć biełaruskaja apazycyja i deputaty Jeŭraparłamientu, – pra panižeńnie pamieru konsulskaha zboru ź biełarusaŭ za šenhienskija vizy.
Siarod 24 zaprošanych biełarusaŭ – staršynia Rady Biełaruskaj Narodnaj Respubliki Ivonka Surviłła, lider apazicyi Alaksandr Milinkievič, staršynia Partyi BNF, piedahoh Lavon Barščeŭski, ekanamist, namieśnik staršyni Abjadnanaj hramadzianskaj partyi Jarasłaŭ Ramančuk, były palitviazień, lider Chryścijanskaj Demakratyi Pavał Sieviaryniec, paet i dypłamat Hienadź Buraŭkin, pravaabaroncy Aleś Bialacki i Valancin Stefanovič, prafiesar-sacyjołah Andrej Vardamacki.
«Biełaruski tydzień» arhanizuje i finansuje najbujniejšaja frakcyja Jeŭraparłamientu — frakcyja Jeŭrapiejskaj narodnaj partyi – Jeŭrapiejskich demakrataŭ.
