Fota BiełaPAN
14 vieraśnia Homielski abłasny sud pryniaŭ rašeńnie słuchać u zakrytym režymie kryminalnuju spravu ŭ dačynieńni da 25-hadovaj žycharki abłasnoha centra, jakaja ŭtapiła svaich dziaciej — dvuchhadovaha syna i 11-miesiačnuju dačku. Chadajničała pra słuchańni ŭ zakrytym režymie abvinavačanaja.
«Tut buduć abmiarkoŭvacca pytańni asabistaha žyćcia, tamu ja chacieła b, kab sud byŭ zakrytym», — paprasiła Aksana. Dziaržaŭny abvinavaŭca nie bačyŭ nieabchodnaści słuchać spravu ŭ zakrytym režymie, paciarpieły, baćka zabitych dziaciej, padtrymaŭ pazicyju prakurora.
Dziejańni žančyny kvalifikavanyja pavodle punktaŭ 2, 6 i 16 častki 2 artykuła 139 KK (zabojstva małaletnich, učynienaje z asablivaj žorstkaściu).
Fota BiełaPAN
Da sudovaha pasiadžeńnia baćka dvuchhadovaha Savielija i 11-miesiačnaj Anhieliny zajaviŭ, što chacieŭ by damahčysia pažyćciovaha źniavoleńnia dla abvinavačanaj. Kryminalny kodeks Biełarusi praduhledžvaje dla žančyn maksimalnaje pakarańnie ŭ vyhladzie 25 hadoŭ pazbaŭleńnia voli.
«Dvaccać piać hadoŭ zanadta mała. Chacia jaje Boh pakaraje, užo pakaraŭ. Jana vielmi lubiła dziaciej, ja nie razumieju, jak heta zdaryłasia. Mahčyma, hetamu spryjali sacyjalnyja słužby, jakija pahražali zabrać dziaciej u Aksany za toje, što ŭ domie było nie prybrana, naprykład. A jak jana mahła zaŭsiody svoječasova prybiracca z dvuma maleńkimi dziećmi? Jana sama ź dziciačaha doma, tamu razumieła, što tam čakaje jaje dziaciej, kali ich zabiaruć», — skazaŭ baćka dziaciej Aleh.
Jon nie byŭ bijałahičnym baćkam Savielija i Anhieliny, ale jurydyčna ŭstanaviŭ baćkoŭstva.
«Aleh paznajomiŭsia ź joj, kali Aksana była ŭžo ciažarnaja, jaje kinuŭ chłopiec. Jany pačali sustrakacca, i Aleh ustanaviŭ baćkoŭstva nad hetym dziciem. Jany žyli razam, potym razyšlisia, i kali Aksana znoŭ zaciažarała, jana zastałasia adna, pamierła jaje ciotka, i jany znoŭ syšlisia z Aleham. Tak jon jurydyčna ličyŭsia baćkam dziaciej. Jon dziaciej vielmi lubiŭ, i dahetul nie moža pieražyć hetaje hora», — rastłumačyła maci maładoha čałavieka Luboŭ Mikałajeŭna. Pavodle jaje słoŭ, abvinavačanaja była vielmi zamknutym čałaviekam. Ałkahol nie ŭžyvała, nie kuryła, dziaciej hladzieła.
Pierad sudovym pasiadžeńniem abvinavačanaja ŭśmichałasia, nie chavała tvar ad fotaaparataŭ i videakamier.
Fota BiełaPAN
Nahadajem, viečaram 7 krasavika žančyna prymała vannu razam z dvuchhadovym synam. Kirujučysia raptam uźnikłaj zadumaj, z metaj pazbaŭleńnia žyćcia, abvinavačanaja pahruziła dzicia ŭ vadu ŭ vańnie i ŭtrymlivała tam da nastupleńnia jaho śmierci.
Zatym jana pryniesła z pakoja dačku 2014 hoda naradžeńnia i ŭtapiła jaje. Paśla hetaha žančyna prybrała ŭ kvatery, dastała cieły dziaciej z vady, pieraniesła ŭ pakoj, apranuła ich i patelefanavała ŭ milicyju.
Pavodle zaklučeńnia psichołaha-psichijatryčnaj ekśpiertyzy, u abvinavačanaj u pieryjad času, jaki adnosicca da ŭčynieńnia zabojstva, dyjahnastujecca dyssacyjalnaje rasstrojstva asoby. Ekśpierty ŭstanavili, što ŭ momant zabojstva jana nie znachodziłasia ŭ stanie afiektu, mahła ŭśviedamlać faktyčny charaktar svaich dziejańniaŭ i kiravać imi.
Abvinavačanaja vychoŭvałasia ŭ dziciačym domie, paśla vučoby ŭ PTV pracavała ŭ AAT «8 Sakavika». Šlub nie zaklučała, raścić dziaciej dapamahaŭ sužyciel, jaki ŭstanaviŭ baćkoŭstva ŭ dačynieńni da chłopčyka i dački. Maci ź dziećmi žyła ŭ sacyjalnaj kvatery ŭ novym mikrarajonie Homiela.
