Karatkievič: Ja suprać taho, kab na našaj terytoryi byli zamiežnyja vajskovyja abjekty
U abied kala ŭniversamu «Centralny» kandydatka ŭ prezydenty Taciana Karatkievič praviała pikiet suprać vajskovaj prysutnaści inšych dziaržaŭ na terytoryi Biełarusi, za zachavańnie neŭtralitetu Biełarusi, jaki prapisany ŭ Kanstytucyi.
Padstavaj dla pikietu stała toje, što ŭ subotu prezydent Rasiei Ŭładzimier Pucin padpisaŭ rasparadžeńnie ab padpisańni pahadnieńnia pamiž Rasiejskaj Federacyjaj i Respublikaj Biełaruś ab rasiejskaj avijacyjnaj bazie na terytoryi Biełarusi.
Spačatku na pikiecie prysutničali tolki pradstaŭniki vybarčaha štabu Taciany Karatkievič. Sama jana zatrymlivałasia ŭ ambasadzie Francyi, dzie sustrakałasia z dyplamatami. Davieranaja asoba spadaryni Karatkievič, aficer zapasu, vajskovy analityk Leanid Spatkaj tłumačyŭ minakam, jakija zapynialisia kala pikietu, jakija zamiežnyja abjekty jość ciapier na terytoryi Biełarusi i čamu kraina tolki imkniecca da neŭtralitetu:
«Što ŭ Biełarusi, što ŭ luboj inšaj krainie śvietu neŭtralitet aznačaje niaŭdzieł va ŭsialakich vajskovych blokach. Pa-druhoje, neŭtralitet — adsutnaść lubych vajskovych abjektaŭ na svajoj terytoryi, pryčym nia tolki vajskovych bazaŭ, ale i inšych vajskovych abjektaŭ, a taksama adsutnaść lubych vajskovych farmavańniaŭ (vajskovych pradstaŭnictvaŭ). Na siońniašni dzień u nas jość dva abjekty Rasiejskaj Federacyi — tak zvanaja stancyja rańniaha papiaredžańnia SPA kala Hancavič i stancyja suviazi kala Vialejki. Taksama neŭtralnaja dziaržava taja, jakaja nia maje nijakich damovaŭ nakont vykarystańnia svaich vajskoŭcaŭ na terytoryi inšych dziaržaŭ. Zhodna z Kanstytucyjaj, Biełaruś ruchajecca ŭ napramku da statusu neŭtralnaj dziaržavy. Ale na siońniašni dzień jość zamiežnyja vajskovyja abjekty».
Taciana Karatkievič, padyšoŭšy, raspaviała: jaje vielmi niepakoić toje, što ŭ Biełarusi źjavicca vajskovaja baza Rasiei, i asabliva toje, što takija važnyja rašeńni prymajucca biez uliku dumki ludziej. Siońniašniaja ŭłada pierastała raicca ź ludźmi, pierakananaja kandydatka ŭ prezydenty. Za apošnija dva dni spadarynia Karatkievič praviała dziesiać sustreč z roznymi ludźmi:
«I samaje važnaje pytańnie, jakoje jany mnie zadavali z sustrečy ŭ sustreču — heta pytańnie pra atamnuju elektrastancyju. Vychodzić, što hetaje važnaje pytańnie ab zaklučeńni damovy, ab budaŭnictvie prajšło dla ludziej nieprykmietna. I siońnia jany zaniepakojenyja svajoj budučyniaj. Takaja ž prablema — heta rašeńnie ab raźmiaščeńni tut zamiežnaj vajskovaj bazy. Ludzi chočuć brać udzieł u pryniaćci rašeńniaŭ.
Ja asabista vystupaju suprać taho, kab na našaj terytoryi byli zamiežnyja vajskovyja abjekty. Ja — za toje, kab siońnia ŭ ludziej pytalisia, ź ludźmi railisia. Mienavita tamu ja siońnia stała kandydatam u prezydenty. Ja pradstaŭlaju hołas tych ludziej, jakija chočuć, kab ź ichniaj dumkaj ličylisia».
Pakolki davieranaja asoba Taciany Karatkievič Leanid Spatkaj — prafesijny vajskovy lotčyk, pałkoŭnik zapasu, to na specyfičnyja pytańni minakoŭ i žurnalistaŭ daviałosia adkazvać jamu. Na pytańnie Radyjo Svaboda, ci možna jašče praduchilić stvareńnie rasiejskaj avijabazy na terytoryi Biełarusi, spadar Spatkaj patłumačyŭ, što, u pryncypie, možna, ale na heta pavinna być vola kiraŭnika Biełarusi:
«A toj prajekt, jaki nadrukavany rasiejskim bokam, ujaŭlaje surjoznuju pahrozu navat nacyjanalnaj biaśpiecy Biełarusi. Kali chto čytaŭ ci znajomiŭsia ź im chacia b na sajcie Belarus Security Blog, źviarnuli ŭvahu na toje, što tam jość takija vyrazy: rasiejskija vajskoŭcy mohuć vykarystoŭvać zbroju zhodna z zakanadaŭstvam Rasiejskaj Federacyi. Pa-druhoje, pad achovu hetaj bazy mohuć pieradyślakavacca i inšyja vajskovyja farmavańni RF (motastrałkovaja dyvizija). Bo ŭ prajekcie damovy niama nijakich abmiežavańniaŭ ni pa kolkaści vajskovaha składu, ni pa kolkaści vajskovych farmavańniaŭ. Hipatetyčna čym heta moža pahražać: da prykładu, pieradyślakujecca rasiejskaja čaść na terytoryi Biełarusi. Niekalki vajskovych ešalonaŭ, kalony aŭtamabilaŭ mohuć raściahnucca pa čyhuncy ci pa šašy ad Voršy da Baranavičaŭ. Jak kažuć, pa śvistku ci syhnale troch zialonych rakiet rasiejcy biaruć pad svoj kantrol čyhunačnyja stancyi ci važnyja pramysłovyja abjekty. Dzie harantyja ad takoj pahrozy? Damova abminaje takija niuansy», — zadaje rytaryčnaje pytańnie davieranaja asoba Taciany Karatkievič Leanid Spatkaj.
Ciapier čytajuć
Prateže łukašenkaŭskaha favaryta Baskava buduje akademiju ŭ Brazilii i Ńju-Vasiuki suśvietnaha maštabu5
Kamientary