Jarmošyna: Razhon akcyi Statkieviča niehatyŭna adbiŭsia b na acency vybaraŭ
Eks-palitviazień Mikałaj Statkievič abviaściŭ, što ŭviečary 23 vieraśnia praviadzie schod vybarcaŭ u centry Minska — na płoščy Svabody.
Padčas vybaraŭ pravodzić schody dla abmierkavańnia vybarčaha pracesu mohuć nie tolki kandydaty ŭ prezidenty ci ich davieranyja asoby, ale i šarahovyja hramadzianie. Pryčym u hety čas dla ich taksama dziejničaje sproščany paradak atrymańnia dazvołu na praviadzieńnie takoha mierapryjemstva: treba za piać dzion da zapłanavanaj akcyi padać zajaŭku ŭ miascovy vykankam. Praŭda, razvažaje staršynia Centrvybarkama Lidzija Jarmošyna, davoli sumnieŭna, što Statkieviču dazvolili b pravodzić masavaje mierapryjemstva na płoščy Svabody: «Kali b Statkievič źviarnuŭsia ŭ miascovy vykankam, to jamu, hladziš, dla hetych metaŭ jak zvyčajna adviali b płošču Banhałor. Ja dumaju, što płošča Svabody, jak i ŭsie astatnija płoščy, nie ŭklučanaja ŭ śpis miescaŭ dla praviadzieńnia hramadska-masavych mierapryjemstvaŭ. Navat dla kandydataŭ u prezidenty — nie kažu ŭžo pra inšych hramadzian».
I kali praviadzieńniu akcyi Statkieviča pieraškodziać pravaachoŭnyja orhany, to heta budzie całkam u miežach ich paŭnamoctvaŭ. Inšaja sprava, jakim čynam heta budzie zroblena. Bo razhon z zatrymańniami drenna paŭpłyvaje na ahulnuju acenku vybaraŭ naziralnikaŭ.
«Kaniečnie, dla mižnarodnaha fonu, jaki važny dla vybarčaj kampanii, heta budzie drenna — heta budzie niehatyŭ. Šmat zaležyć ad nastupstvaŭ samich vybaraŭ, ad atmaśfiery… Heta ŭsio nazapašvajecca. Ale heta budzie nie hałoŭnym dla pryznańnia ci niepryznańnia vybaraŭ, tamu chaj jon sabie nie prypisvaje niejkaj vybitnaści. Ale tak — budzie adnym z faktaram, što budzie ŭličany».
Nahadajem, padčas siońniašniaha schodu palityk choča zadać Alaksandru Łukašenku šerah «niazručnych pytańniaŭ». Jon zaprasiŭ i kiraŭnika dziaržavy naviedać akcyju.
Ciapier čytajuć
Paśla vystupleńnia Łuhanskaha teatra ŭ Minsku adna z hladačak vyhuknuła «Słava Ukrainie!»2
Kamientary