U Biełarusi zatrymany eks-načalnik kiravańnia pa Maskoŭskaj vobłaści sudovaha departamienta pry Viarchoŭnym sudzie Valeryj Kuźmič i jaho namieśnik pa finansach Jaŭhien Citoŭ. Abodva abvinavačvajucca ŭ maštabnych kradziažach biudžetnych srodkaŭ, jakija vydzialalisia na apłatu pasłuh pierakładčykaŭ. Pra heta paviedamlaje hazieta «Kommiersant».
Abodva fihuranty rasijskaj kryminalnaj spravy byli abvieščanyja ŭ mižnarodny vyšuk. Basmanny sud Maskvy zavočna vydaŭ sankcyju na ich aryšt.
Jany abvinavačvajucca ŭ šmatmiljonnych kradziažach srodkaŭ, jakija vydzialalisia na apłatu pracy pierakładčykaŭ u sudach Maskoŭskaj vobłaści. Pa viersii śledstva, praź firmu «Rabikon-K» najmali pierakładčykaŭ dla sudoŭ i praz hetuju kampaniju apłačvalisia ich pasłuhi. U pieryjad ź lutaha 2010 hoda pa luty 2015 hoda sudovaje kiravańnie pa Maskvie vydzieliła na apłatu pasłuh pierakładčykaŭ 1,4 młrd rasijskich rubloŭ (kala 21 miljonaŭ dalaraŭ na siońniašni dzień, biez uliku devalvacyi rasijskaha rubla — TUT.BY), jakija byli pieraličanyja na rachunki «Rabikona-K». Na samaj spravie za svaju pracu ŭ sudach pierakładčyki atrymlivali litaralna kapiejki, a rašeńni ab vypłacie im bujnych sum złamyśniki padrablali. Z kampanii hrošy sychodzili na rachunki dvuch TAA, zatym — jašče na rachunki niekalkich firmaŭ, u tym liku i ŭ afšory. Ślady vykradzienych srodkaŭ byli vyjaŭlenyja ŭ Sinhapury i na Kipry.
Pa infarmacyi «Kommiersanta», Valeryj Kuźmič i Jaŭhien Citoŭ byli zatrymanyja supracoŭnikami KDB Biełarusi praktyčna adrazu ž paśla pierasiačeńnia miažy. Mabilnyja telefony, jakimi karystalisia byłyja čynoŭniki, znachodzilisia na prasłuchoŭcy rasijskich śpiecsłužbaŭ, jakija papiaredzili pra ich pryjezd biełaruskich kaleh. U Rasieju byłyja čynoŭniki buduć ekstradavanyja ŭžo ŭ najbližejšy čas.
Pa niekatorych dadzienych, Valeryj Kuźmič i Jaŭhien Citoŭ prybyli da svajakoŭ u Biełaruś ź Italii, dzie žyli ŭ apošni čas.
Kamientary