Nacyjanalny aeraport «Minsk» i abłasnyja aeraporty Biełarusi zmohuć pryniać tranzitnych pasažyraŭ paśla taho, jak avijaruch pamiž Ukrainaj i Rasijaj spynicca, paviedamiŭ namieśnik ministra transpartu Jaŭhien Rahačoŭ.
«Nacyjanalny aeraport «Minsk», i abłasnyja aeraporty, i kampanija «Biełavija» całkam hatovyja da pryjomu pasažyraŭ, jakija prymuć rašeńnie nakiroŭvacca va Ukrainu tranzitam praz našu krainu», — skazaŭ Rahačoŭ.
«Praciahvajucca pieramovy z avijacyjnymi ŭładami Ukrainy i Rasii, z avijakampanijami. Pry nieabchodnaści «Biełaeranavihacyja» i našy avijaŭłady prapracujuć ŭsie nieabchodnyja stykoŭki, kab pasažyram było kamfortna», — dadaŭ jon.
Pradstaŭniki avijakampanij padkreślivali raniej, što naroščvańnie intensiŭnaści ruchu strymlivajecca zaćvierdžanym bakami limitam častaty palotaŭ.
Aficyjny pradstaŭnik «Biełavija» Ihar Čarhiniec zajaviŭ pry hetym, što damahačča pavieličeńnia častaty palotaŭ va Ukrainu i Rasiju stanie metazhodnym pry realnym pavieličeńni pasažyrapatoku.
Pakul biełaruski avijapieravozčyk hatovy zamianić samaloty, jakija kursujuć u Kijeŭ, na bolš jomistyja.
U kancy minułaha tydnia ŭrad Ukrainy vyrašyŭ zabaranić lotać u krainu rasijskim avijakampanijam, u pieršuju čarhu «Aerafłotu» i «Transaera». Taksama vyrašana zabaranić rasijskim samalotam ździajśniać tranzitnyja pieraloty praz pavietranuju prastoru Ukrainy ŭ vypadku, kali jany viazuć hruzy vajennaha pryznačeńnia.
Praz try dni ministerstva transpartu Rasii zabaraniła ukrainskim avijakampanijam paloty nad rasiejskaj terytoryjaj. Zabarona ŭstupaje ŭ siłu 25 kastryčnika.
