U Astanie zaviaršylisia pasiadžeńni savieta kiraŭnikoŭ udzielnic SND i pasiadžeńnia Vyšejšaha Jeŭrazijskaha ekanamičnaha savieta. Nasyčany palityčnymi padziejami dla cichaha vosieńskaha Baravoha dzień prajšoŭ u bolšaj svajoj stupieni biez udziełu žurnalistaŭ.
Fota Turara Kazanhapava, Tengrinews.kz
Pačatak pasiadžeńniaŭ adstavaŭ ad zajaŭlenaj prahramy praviadzieńnia jak minimum na hadzinu. Śpikiery patłumačyli heta tym, što mienavita na sustrečach u vuzkim składzie, kudy nie dapuskali žurnalistaŭ, i adkul nie było tranślacyi, abmiarkoŭvalisia ŭsie aktualnyja pytańni.
Tak pašyranaje pasiadžeńnie Vyšejšaha Jeŭrazijskaha ekanamičnaha savieta pačałosia ŭ 17.30 zamiest zajaŭlenych 15.05. Tranślacyja jašče nie pačałasia, ale žurnalisty ŭžo čuli hołas Alaksandra Łukašenki: «Nursułtan Abišavič, u pašyranym składzie vitać budziecie?» Pačuŭsia adkaz kazachstanskaha prezidenta: «Abaviazkova».
I śledam fraza biełaruskaha lidara, jaki ŭ hety dzień ŭznaharodziŭ Nazarbajeva Ordenam družby narodaŭ: «Kali łaska, skažycie try słovy. Słova maje Prezident Kazachstana».
«Rady vitać vas na kazachstanskaj ziamli, u pryhožym Baravym», — skazaŭ Nazarbajeŭ i pieradaŭ słova Łukašenku.
«Pavažanyja siabry, u nas siońnia naohuł ciažki dzień. I na SND my niečakana ŭ hłybiniu ŭvajšli, abmierkavali našy prablemy. I tut abmierkavali vielmi surjoznyja pytańni, u paradku dnia ŭ nas 15 pytańniaŭ. Vyjšli za miežy paradku dnia, źviarnuŭšysia da nadzionnych prablemaŭ raźvićcia našaha sajuza», — adznačyŭ kiraŭnik Biełarusi.
Łukašenka dadaŭ, što byli abmierkavanyja pytańni, źviazanyja z ustupleńniem Kyrhyzstana ŭ JEAES.
«Damovilisia ab tym, (prapanova była padtrymana prezidentami Rasii i Kazachstana), što jany samym surjoznym čynam papracujuć na miažy z Kyrhyzstanam, i zrobiać maksimum, kab narod Kyrhyzstana zrazumieŭ, kudy jon ustupiŭ i jakuju karyść maje ad JEAES. I chaj prezidenta Kyrhyzstana nichto nie krytykuje, jon zaniaŭ prystojnuju pazicyju. Upeŭnieny, što zruchi buduć tut vielmi istotnyja ŭ bok Kyrhyzstana, u tym liku pa staŭkach na naš ahulny rynak, i pradukcyi i tavaraŭ, jakija isnujuć u Kyrhyzstanie. U bližejšy čas, dumaju, da novaha hoda, hetyja pytańni buduć prasunutyja i Kyrhyzstan nie paškaduje, što ŭstupiŭ u Adziny ekanamičny sajuz», — skazaŭ Łukašenka. Jon adznačyŭ, što 15 pytańniaŭ byli razhledžany ŭ vuzkim składzie.
«My pryniali rašeńnie ab tym, što z 1 lutaha nastupnaha hoda Armienija budzie staršynstvavać u kalehii Jeŭrazijskaj ekanamičnaj kamisii. I pryniali rašeńnie, chto budzie ŭznačalvać paśla Rasii našu kamisiju», — rastłumačyŭ kiraŭnik Biełarusi. Kamisiju ŭznačalić Tyhran Sarkisian, były premjer-ministr Armienii.
Łukašenka dadaŭ, što ŭsie pytańni paradku abmierkavany, i tak jak prezidenty vystupili ŭ vuzkim składzie, u pašyranym — dyskusiju vyrašyli nie razhortvać.
Žurnalistam zastavałasia tolki zdahadvacca pra toje, jakija haračyja batalii razharnulisia za začynienymi dźviaryma.
Akramia taho, stała viadoma, što papiarednie nastupnaja sustreča ŭdzielnikaŭ JEAES adbudziecca ŭ śniežni hetaha hoda ŭ Maskvie.
«Usie pytańni vyčarpanyja. Chaču padziakavać ad usich nas Nursułtanu Abišaviču za hety ciažki dzień, jaki my praviali na cudoŭnaj kazachskaj ziamli. Padziakavać za haścinny pryjom», — reziumavaŭ Łukašenka
