Chakieisty minskaha «Dynama» i v.a. hałoŭnaha treniera Andrej Kavaloŭ źviarnulisia da Alaksandra Łukašenki z prośbaj adpuścić na volu da rašeńnia suda byłoha hienieralnaha mieniedžara kłuba — v.a. hiendyrektara Uładzimira Bieražkova. Kopiju lista z podpisami publikuje spartyŭnaja hazieta «Priessboł», dzie Bieražkoŭ z 1995 hoda pa 2014-y byŭ hałoŭnym redaktaram.
«Nam nie chočacca, dyj my i nie majem prava davać acenku dziejańniam pravaachoŭnych orhanaŭ — upeŭnienyja, sud vyniesie spraviadlivy vierdykt pa hetaj spravie. My ŭsiaho tolki prosim vas jak čałavieka, jaki dobra viedaje śviet vialikaha chakieja, uvažliva pastavicca da losu čałavieka, jaki pryjšoŭ u minułym siezonie ŭ minskaje «Dynama», — havorycca ŭ liście.
Bieražkoŭ, zaznačajuć aŭtary, «jašče da prychodu ŭ kłub mieŭ vopyt arhanizacyi chakiejnaj haspadarki, pracujučy ŭ fiederacyi chakieja ŭ toj pieryjad, kali jana ŭstavała na nohi». «U našu kamandu pryjšoŭ mocny prafiesijanał, poŭny rašučaści realizavać usie svaje płany i słavalubnyja ambicyi, — padkreślivajuć padpisanty. — Jamu mnohaje ŭdałosia zrabić, pačynajučy ad «darožnaj karty» — mier pa raźvićci biełaruskaha chakieja — i zakančvajučy niepasredna vynikam».
«Možna pa-roznamu stavicca da Bieražkova, ale treba pryznać, što jon addavaŭsia pracy biez astatku i patrabavaŭ takoha ž staŭleńnia i ad inšych», — padkreślivajuć chakieisty. Jany prosiać «prajavić da Uładzimira Piatroviča toj kavałačak zvyčajnaj čałaviečaj miłasernaści, jaki možna dazvolić na siońnia — adpuścić na volu da rašeńnia suda». «Jon nie ŭjaŭlaje hramadskaj niebiaśpieki i nie zrobić sprobaŭ uciačy ad pravasudździa», — upeŭnienyja hulcy.
Aprača taho, na ich dumku, vyzvaleńnie top-mieniedžara «spryjalna adabjecca na imidžy minskaha «Dynama», jaki istotna pachisnuŭsia ŭ suviazi z apošnimi padziejami ŭ kłubie, i vykliča stanoŭčy rezanans u ajčynnych i rasijskich ŚMI, jakija praciahvajuć sačyć za losam Uładzimira Bieražkova».
Aprača v.a. hałoŭnaha treniera Kavalova list padpisali 26 chakieistaŭ, u tym liku Alaksiej Kalužny, Nik Bejlen, Poł Ščachura, Rajan Vieskie, Šarl Linhle, Łukaš Krajčak, Dźmitryj Milčakoŭ, Met Elisan, Andrej Michaloŭ, Alaksandr Maciaruchin, Artur Haŭrus.
***
14 žniŭnia 2015 hoda (u liście chakieistaŭ pamyłkova ŭkazana, što heta adbyłosia letaś) Śledčy kamitet paviedamiŭ ab zatrymańni Bieražkova pa padazreńni ŭ kradziažy hrašovych srodkaŭ kłuba i raspačynańni ŭ dačynieńni da jaho spravy na padstavie č. 3 art. 210 KK. 27 žniŭnia pradstaŭniki SK i MUS raskazali žurnalistam, što Bieražkovu było vystaŭlena abvinavačvańnie ŭ zavałodańni hrašovymi srodkami kłuba na sumu 1 młrd. 90 młn. rubloŭ z vykarystańniem słužbovych paŭnamoctvaŭ (č. 4 art. 210 KK), što jon hatovy kampiensavać naniesieny ŭron, maje namier prasić Alaksandra Łukašenku ab pamiłavańni i supracoŭničaje sa śledstvam. U siaredzinie kastryčnika rasśledavańnie ŭ dačynieńni da Bieražkova było praciahnuta.
U lipieni hetaha hoda byŭ aryštavany hienieralny dyrektar «Dynama» Maksim Subotkin. «Kryminalnaja sprava raspačataja pavodle vynikaŭ apieratyŭna-vyšukovaj dziejnaści hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj MUS Respubliki Biełaruś, — paviedamiŭ tady SK. — Dziejańni byłoj słužbovaj asoby kvalifikavanyja na padstavie č. 3 art. 424 (złoŭžyvańnie słužbovymi paŭnamoctvami, jakoje paciahnuła ciažkija nastupstvy ŭ vyhladzie pryčynieńnia ŭronu ŭ asabliva bujnym pamiery) Kryminalnaha kodeksa Respubliki Biełaruś».
Na minułym tydni kamandu pakinuŭ hałoŭny trenier słavak Lubamir Pokavič. Pavodle nieaficyjnaj infarmacyi, heta zdaryłasia z-za cisku z boku kiraŭnictva kłuba i faktyčnaj straty nastaŭnikam prava hołasu.
