Sapraŭdny «žydabanderaviec» pieramoh na vybarach u Dnieprapiatroŭsku
Na miascovych vybarach, jakija adbylisia va Ukrainie na minułych vychodnych, kresła deputata atrymaŭ Ašer Jazep Čarkasski — bajec ukrainskaha dobraachvotnickaha pałka i artadaksalny judej.
Pra heta ŭ svaim Facebook paviedamiŭ ukrainski palityk Barys Fiłataŭ.
«Jon prajšoŭ u deputaty. Druhi pa śpisie našaj partyi. Nabraŭ bolš za advakataŭ, vałancioraŭ i daktaroŭ. U pracoŭnym rajonie. Žaŭnier, jaki abaraniaŭ Piaski. Artadaksalny judej, jaki tydniami na froncie jeŭ kilku ŭ tamacie, bo jana kašernaja. Uciakač z Kryma, jaki nie moža abniać svaju maci», — napisaŭ Fiłataŭ.
Čarkasski słužyŭ u bataljonie i zatym pałku MUS Ukrainy «Dniepr-1» i byŭ niekalki raz paranieny. Ciapier jon žyvie ŭ Dnieprapiatroŭsku.
Jon zapisaŭsia na słužbu dobraachvotnikam u 2014 hodzie i ŭdzielničaŭ u samych ciažkich bajach taho času.
«Biehčy (u Izrail) było soramna, i my vyrašyli zastacca tut. I kali ja daviedaŭsia, što jość mahčymaść pajści ŭ dobraachvotnicki bataljon, ja heta zrabiŭ. Heta hramadzianski abaviazak i abaviazak luboha mužčyny, jaki sapraŭdy mužčyna — abaranić svaju siamju i dziaciej», — kazaŭ tady Ašer.
Kamientary