На мясцовых выбарах, якія адбыліся ва Украіне на мінулых выходных, крэсла дэпутата атрымаў Ашэр Язэп Чаркасскі — баец украінскага добраахвотніцкага палка і артадаксальны юдэй.
Пра гэта ў сваім Facebook паведаміў украінскі палітык Барыс Філатаў.
«Ён прайшоў у дэпутаты. Другі па спісе нашай партыі. Набраў больш за адвакатаў, валанцёраў і дактароў. У працоўным раёне. Жаўнер, які абараняў Пяскі. Артадаксальны юдэй, які тыднямі на фронце еў кільку ў тамаце, бо яна кашэрная. Уцякач з Крыма, які не можа абняць сваю маці», — напісаў Філатаў.
Чаркасскі служыў у батальёне і затым палку МУС Украіны «Днепр-1» і быў некалькі раз паранены. Цяпер ён жыве ў Днепрапятроўску.
Ён запісаўся на службу добраахвотнікам у 2014 годзе і ўдзельнічаў у самых цяжкіх баях таго часу.
«Бегчы (у Ізраіль) было сорамна, і мы вырашылі застацца тут. І калі я даведаўся, што ёсць магчымасць пайсці ў добраахвотніцкі батальён, я гэта зрабіў. Гэта грамадзянскі абавязак і абавязак любога мужчыны, які сапраўды мужчына — абараніць сваю сям'ю і дзяцей», — казаў тады Ашэр.
Цяпер чытаюць
Дзве ўдачы, дзякуючы якім адбылася кар'ера новага прэс-сакратара МЗС Руслана Варанкова13
Каментары