Upieršyniu ŭ Baranavičach baćkoŭskich pravoŭ była pazbaŭlenaja niepituščaja žančyna. Pryčynaj stała praźmiernaje zachapleńnie kampjutaram.
Ilustracyjnaja vyjava, jsfelectronics.com
Pieršymi tryvohu zabili školnyja piedahohi: u chatu da vučnia małodšych kłasaŭ patrapić akazałasia niemahčyma, dy i sama maci, jakaja adna vychoŭvaje dzicia, nikoli nie išła na kantakt sa škołaj. Tady piedahohi źviarnulisia ŭ kamisiju pa spravach niepaŭnaletnich.
Členy kamisii źviazalisia z babulaj dziciaci i vyśvietlili: u siamji sapraŭdy jość prablema.
«My vyśvietlili, što maci dziciaci, jakaja vychoŭvaje jaho biez baćki, nidzie nie pracuje, viadzie ŭtrymanski ład žyćcia, a ŭvieś svoj čas pravodzić na kanapie z kubkam kavy, čypsami i noŭtbukam, — raspaviadaje Śviatłana Jurčyk, namieśnik staršyni kamisii pa spravach niepaŭnaletnich Baranavickaha harvykankama. — Maci šmat času kamunikavała ŭ sacyjalnych sietkach, asabliva z procilehłym połam: tak jana sprabavała ŭładkavać svajo asabistaje žyćcio. U volny ad pierapiski čas hulała ŭ roznyja hulni. A voś na dohlad i vychavańnie dziciaci času ŭ jaje nie było. Usie kłopaty pra jaho byli ŭskładzienyja na babulu, jakaja časta jaho zabirała».
Rašeńniem kamisii pa spravach niepaŭnaletnich dzicia było zabranaje ź siamji i pryznanaje majučym patrebu ŭ dziaržaŭnaj abaronie.
Charakterna, što, kali členy kamisii pryjechali za dziciem, im daviałosia vyklikać supracoŭnikaŭ MNS, kab patrapić u kvateru.
Maci, jakaja całkam pahruziłasia ŭ virtualny śviet, prosta pierastała reahavać na lubyja prajavy śvietu realnaha, a tamu nikoli i nikomu nie adčyniała dźviery.
Šeść miesiacaŭ — taki termin dali maci, kab vypravić situacyju i viarnuć dzicia. Joj dapamahli ŭładkavacca na pracu, nakiravali na kansultacyju ŭ psichanieŭrałahičny dyspansier. Adnak heta nie dapamahło: maci nie viarnułasia ŭ realny śviet.
Rašeńniem suda Baranavickaha rajona i h. Baranavičy žančyna była pazbaŭlenaja baćkoŭskich pravoŭ.
«Padobny vypadak u našaj praktycy pieršy, — raspavioŭ staršynia suda Mikałaj Kmita. — Byccam by i niepituščy čałaviek, i nie apuściŭsia ŭ ahulnapryniatym sensie, ale pakidać dzicia było nielha: pobač z takoj maci jon prosta znachodziŭsia ŭ niebiaśpiecy».
Siońnia dzicia vychoŭvajecca ŭ zamiaščalnaj siamji.
