Fota Dźmitryja Bruško, Tut.by
Prypyniajučy sankcyi ŭ dačynieńni da biełaruskich čynoŭnikaŭ i šerahu pradpryjemstvaŭ, Jeŭrasajuz kaža, što hatovy pačać budavać adnosiny ź Biełaruśsiu z čystaha lista. Pra heta zajaviŭ pasoł Hiermanii ŭ Biełarusi Pieter Detmar 18 listapada padčas kanfierencyi «Vychad na novyja rynki», jakaja prachodzić u Minsku ŭ miežach Suśvietnaha tydnia pradprymalnictva.
Dypłamat ličyć, što ekanamičnyja prablemy Biełarusi apošnich hadoŭ u bolšaj stupieni źviazanyja z pryniatymi ŭ krainie palityčnymi rašeńniami, čym ź dziejańniem jeŭrapiejskich sankcyj. «Prypynieńnie sankcyj ES — heta adkaz na toje, što adbyvałasia ŭ vašaj krainie apošnim časam. I hetym žestam my zaprašajem vas pačać adnosiny z nula, z čystaha lista. Spadziajusia, my zdolejem pabudavać paŭnacenny dyjałoh», — zajaviŭ pasoł.
Pavodle jaho słoŭ, prypynieńnie sankcyj źjaŭlajecca jaŭnym sihnałam Jeŭrasajuza ab tym, što jon «hatovy zapluščyć vočy na padziei ŭ Biełarusi papiarednich hadoŭ i hatovy nadavać uvahu tamu, što mahčymaje ŭ budučyni».
U svaju čarhu pasoł Vialikabrytanii Brus Bakneł udakładniŭ, što ES uvodziŭ sankcyi nie suprać Biełarusi jak dziaržavy, a suprać peŭnych ludziej. «Prypynieńnie sankcyj pryviało da taho, što palityčnyja ryzyki pry inviestavańni ŭ Biełaruś i viadzieńni tut biźniesu źnizilisia. Ale sankcyi ŭ dačynieńni da Biełarusi nie źjaŭlalisia vialikaj pieraškodaj dla raźvićcia biźniesu, jany nie paraŭnalnyja z tymi sankcyjami, jakija ŭviedzienyja da Rasijskaj Fiederacyi», — adznačyŭ dypłamat, padkreśliŭšy, što maje na ŭvazie i sankcyi suprać rasijskich bankaŭ.
29 kastryčnika Jeŭrasajuz na čatyry miesiacy prypyniŭ dziejańnie sankcyj u dačynieńni da Biełarusi. «Saviet prypyniŭ na čatyry miesiacy zamarožvańnie aktyvaŭ i vizavyja abmiežavańni dla 170 fizičnych asob, a taksama zamarožvańnie aktyvaŭ dla troch pradpryjemstvaŭ Biełarusi, — havaryłasia ŭ paviedamleńni pres-słužby Savieta ES. — Hetaje rašeńnie było pryniataje ŭ adkaz na vyzvaleńnie 22 žniŭnia ŭsich biełaruskich palitźniavolenych i ŭ kantekście palapšeńnia adnosin pamiž ES i Biełaruśsiu». Pry hetym čatyry čałavieki, «jakija majuć dačynieńnie da nie rasśledavanych źniknieńniaŭ u Biełarusi», zastajucca pad sankcyjami. Heta Uładzimir Navumaŭ, Viktar Šejman, Dźmitryj Paŭličenka i Juryj Sivakoŭ.
