U vystavačnaj zale Muzieja historyi horada Mahilova 2 śniežnia adbudziecca prezientacyja niavydanaj unikalnaj antałohii «Mahiloŭski fotaalbom. 1864-2000», jakaja raskazvaje ab historyi fatahrafii ŭ Mahilovie jak samastojnaha vidu tvorčaści ź siaredziny XIX stahodździa i da 2000 hoda. Pra heta paviedamili ŭ muziei.
Upieršyniu budzie zroblena sproba prasačyć raźvićcio fotamastactva ad samych pieršych krokaŭ u rehijonie, jakim źjaŭlajecca Mahiloŭ. Pik roskvitu mahiloŭskaj tvorčaj fatahrafii prypaŭ na apošniuju čverć XX stahodździa. Jana hruntavałasia na ahulnasuśvietnym dośviedzie, pry hetym mieła svaju miascovuju historyju ŭ asobie bytavych fatohrafaŭ darevalucyjnaha i davajennaha pieryjadaŭ, a taksama ŭ asobie śpiecyjalistaŭ bytavych fotaatelje, fotažurnalistaŭ i fotaamataraŭ siaredziny XX stahodździa. Pošuk i padbor ilustracyj ažyćciaŭlaŭsia jak u muziejnych archivach, tak i ŭ siamiejnych albomach i archivach kalekcyjanieraŭ.
«Kožny sa zdymkaŭ adlustroŭvaje duch času ź jaho niepaŭtornaściu. Albom ža ŭ cełym raskazvaje nie tolki ab mahiloŭskaj čorna-biełaj fatahrafii, jaje aŭtarach, ale i pakazvaje historyju horada i jaho žycharoŭ. Niekatoryja ŭnikalnyja fota buduć pradstaŭleny dla ahladu šyrokaj publicy ŭpieršyniu», — adznačyli surazmoŭcy.
Składalnikami knihi źjaŭlajucca mahiloŭskija žurnalisty i fatohrafy Iryna Savosina i Alaksandr Licin. Dyzajn knihi ažyćciaviŭ Hienadź Karčeŭski. Nieacennuju dapamohu ŭ padrychtoŭcy alboma akazaŭ staršynia mahiloŭskaha narodnaha fotakłuba «Viasiołka», viadomy mahiloŭski fatohraf Anatol Tałkačoŭ.
Prezientacyju ilustruje vialikaja vystava fatahrafičnych rabot mahiloŭskich aŭtaraŭ, jakaja achoplivaje pieryjad z druhoj pałaviny XIX stahodździa i da 2000 hoda ŭklučna.
Vystav raźličanaja na ŭsich, chto cikavicca fatahrafičnaj tvorčaściu i historyjaj horada Mahilova.
