U Baranavičach 23-hadovy miascovy žychar, jaki nidzie nie pracuje, pryhavorany da siami hadoŭ kałonii strohaha režymu za DTZ sa śmiarotnym kancom.
Jak paviedamiła staršy pamočnik Baranavickaha mižrajonnaha prakurora Volha Łajša, jakaja padtrymlivała dziaržaŭnaje abvinavačańnie pa spravie, 17 červienia ŭ 2.15 u Baranavičach na vulicy Kirava małady čałaviek u stanie ałkaholnaha apjanieńnia na aŭtamabili «Reno-Łahuna» nie spraviŭsia z kiravańniem na zakruhleńni darohi, nalacieŭ na bardziur i vyjechaŭ za miežy prajeznaj častki. Tam mašyna ŭrezałasia ŭ stojku darožnaha znaka, a zatym u śvietłavuju aporu.
U vyniku DTZ 23-hadovy pasažyr, jaki siadzieŭ na zadnim siadzieńni, ad atrymanych traŭm pamior na miescy.
Usiaho ŭ momant avaryi ŭ aŭtamabili znachodzilisia piać čałaviek. Kiroŭca i troje jaho pasažyraŭ vybralisia z «Reno» i ŭciakli. Ranicaj 17 červienia supracoŭniki milicyi zatrymali kiroŭcu. Na momant učynieńnia DTZ małady čałaviek byŭ pazbaŭleny prava zajmacca dziejnaściu, źviazanaj z kiravańniem transpartnymi srodkami, za vadžeńnie ŭ pjanym vyhladzie.
Było ŭstanoŭlena, što jon jechaŭ na «Reno» z vyklučanymi farami z chutkaściu kala 120 km u hadzinu pry maksimalna dazvolenaj na hetym učastku nie bolšaj za 60 km u hadzinu.
3 śniežnia sud Baranavickaha rajona i horada Baranavičy pryznaŭ kiroŭcu vinavatym na padstavie č. 4 art. 317 KK (parušeńnie praviłaŭ darožnaha ruchu asobaj, jakaja kiravała transpartnym srodkam u stanie ałkaholnaha apjanieńnia, što mieła vynikam pa nieaściarožnaści śmierć paciarpiełaha), pa č. 2 art. 317-1 KK (kiravańnie transpartnym srodkam asobaj, jakaja znachodziłasia ŭ stanie ałkaholnaha apjanieńnia, učynienaje asobaj, jakaja raniej učyniła złačynstva, praduhledžanaje artykułam 317-1 KK) i pa art. 417 KK (uchileńnie asudžanaha ad vykanańnia pryhavoru suda ab pazbaŭleńni prava zajmacca peŭnaj dziejnaściu).
Sud pryhavaryŭ aŭtamabilista da siami hadoŭ pazbaŭleńnia voli ŭ kałonii strohaha režymu. Taksama jon pazbaŭleny prava na praciahu piaci hadoŭ zajmacca dziejnaściu, źviazanaj z kiravańniem transpartnymi srodkami, i aštrafavany na 400 bazavych vieličyń (72 młn rubloŭ).
Aŭtamabil «Reno», jaki naležyć maci abvinavačvanaha, kanfiskavany ŭ dachod dziaržavy. Sud spahnaŭ z uładalnicy aŭtamabila 50 młn rubloŭ na karyść maci zahinułaha pasažyra ŭ jakaści materyjalnaj kampiensacyi maralnaha ŭronu.
Małady čałaviek pryznaŭ svaju vinu i raskajaŭsia ŭ tym, što zrabiŭ. Pryhavor jašče nie nabyŭ zakonnuju siłu i moža być abskardžany.
