Vinsent: Nijakich kampramisaŭ! Tolki biełaruskamoŭny rep!

Biełaruski repier Vinsent raspavioŭ belsat.eu, čamu baraćba za biełaruskuju movu važniejšaja, čymsia baraćba za ŭładu. A taksama patłumačyŭ, u čym roźnica pamiž im dy Maksam Karžom.

Spampavać i pasłuchać albom «Vir» možna tut >>>

Nie varta mianie paraŭnoŭvać z Maksam Karžom, bo Maksim robić rasiejski rep, jaki moža być zapisany ŭ Piermi, Čelabinsku i navat u Miensku. A ja rablu biełaruski rep. Heta zusim roznyja rečy.

Biełaruski rasiejskamoŭny rep nie jość biełaruskim u tvaim razumieńni?

– Prykoł u tym, što kali biełaruski rasiejskamoŭny trek pastaviać na radyjo Bi-Bi-Si, to jaho ŭsio roŭna buduć nazyvać «russian rap». Ja asabista z hetym sustrakaŭsia. Ja suprać rasiejskaj kultury ničoha nie maju. Jana mnie vielmi cikavaja, ale nie treba śpichvać usio na asiarodździe i ŭvieś čas šukać dla sabie apraŭdańni.

Maks Korž robić rasiejski rep?

– Usio prosta. Voś, naprykład, polski rep – heta rep na polskaj movie. Ni na niamieckaj, ni na rasiejskaj. Adnym słovam, biełaruski rep pavinien być biełaruskim. A Maks robić rasiejski rep. Ja ź im, darečy, daŭno znajomy. Pamiataju, kali Maksim jašče žyŭ u Miensku na Puškinskaj. My prychodzili da jaho, a tam takaja chata dabitaja była. Ja ŭ internacie žyŭ, i my navat razam bity niejkija krucili. Ciapier redka bačymsia.

Nu dobra. A što adbyvajecca ciapier na ŭłasna biełaruskaj rep-scenie? Ja akramia «ČpB», «Vožyka», SP Kava i ciabie bolš nikoha nie viedaju, choć i cikaŭlusia repam z 16-ci hadoŭ.

– Ničoha nie adbyvajecca. Ty pieraličyŭ amal što ŭsich biełaruskich repieraŭ. Niama pra što raspavieści, ale reśpiekt usim, chto štości robić. Biełaruski rep źjaviŭsia zusim niadaŭna. Kali nie pamylajusia, historyja biełaruskaha repu pačałasia ŭ 1995 h., paśla taho, jak «TS-52» vypuścili na kasiecie trek «Naša Siła».

Mnie padajecca, što raniej ty rabiŭ taki liryčny rep. I pryznajusia – nie kranała. A trek «Žyvy» bližej da fiłasofii maksimalizmu. U tekście jość słovy: «Ale mnie nie zrazumieć, jak možna bicca ŭ paŭsiły. Kali ŭviazaŭsia ŭ bojku, pieramažy, parvaŭšy žyły». Heta začapiła. Dzie, darečy, zdymali klip?

– U Miensku. Mnohich heta ździŭlaje, maŭlaŭ, jak vy tak Miensk pakazali, tak kruta vyhladaje, tak sučasna i pryhoža… Ludzi prosta nie ŭsprymajuć biełaruskamoŭny pradukt jak niešta jakasnaje, firmovaje. Kali ludziam buduć pakazvać niešta pryhožaje, to jany pačnuć lubić svajo. Kali niechta ź biełaruskich tvorcaŭ napiša drennuju pieśniu i zdymie na jaje drenny klip, to, viadoma, ludzi padumajuć: aj, jak zaŭsiody, heta ž naš kałhas. Pavinna być niejkaja adkaznaść za toje, što ty robiš.

Na jakasny pradukt patrebnyja hrošy ci dastatkova tolki žadańnia, i ŭsio atrymajecca?

– Možna pajści ŭ studyju i zapisacca, i kaštuje heta davoli tanna. Užo niama takoha, kali adna studyja na horad z šalonymi koštami. Ciapier studyjaŭ šmat. U mianie, naprykład, svajo abstalavańnie. I ŭrešcie jość internet. Zapisaŭ svajo muzło, zakinuŭ u internet – i ŭsio. Nie treba ni šmat hrošaj, ni telebačańnia.

Dobra, jość mahčymaści, studyi, technałohii raspaŭsiudu, ale za 20 hadoŭ nie sfarmavałasia biełaruskamoŭnaja rep-tusoŭka. Čamu?

– U krainie, dzie 95 % ludziej razmaŭlajuć na rasiejskaj movie, adpaviedna, stolki ž rasiejskaha repu robicca ŭ Biełarusi. Usio ŭpirajecca ŭ palityku, a mianie palityka nie cikavić. Ja pavažaju tych, chto adsiadzieŭ u turmie, nie padpisaŭ prašeńnia ab pamiłavańni. Heta mužnyja ludzi. Mianie taksama asacyjujuć z palitykaj, ź niejkimi ruchami i h.d. U Biełarusi palityki niama. Jość niejkaja imitacyja palityčnaha pracesu. Mnie padajecca, što treba zajmacca biełaruskaj movaj i kulturaj – heta važniej za baraćbu za ŭładu. Voś čamu ja rablu biełaruski rep.

U miedyjach pišuć, cytuju: Vinsent viarnuŭsia ŭ Miensk z novym albomam. Čamu ty byŭ vymušany syści ŭ karotkačasovyja, jak vyśvietliłasia, emihranty, i što paciahnuła damoŭ?

– Paśla taho, jak ja źniaŭsia ŭ filmie «Žyvie Biełaruś», na mianie pačali cisnuć. Ja paraiŭsia sa znajomymi i źjechaŭ. A viarnuŭsia, bo mnie tut padabajecca. Tut adbyvajucca źmieny i pierałom epochaŭ. Na Zachadzie mnie było sumna. Tam užo ŭsio adbyłosia, i kardynalna ničoha nie źmienicca. Tam ludzi kłapociacca pra toje, kab na paru adsotkaŭ źnizić padatak na dadadzienuju vartaść. I heta narmalna. Biełaruś pavinna imknucca da hetaha spakoju i ŭładkavanaści. U nas ža sacyjalizm, źmiena pakaleńniaŭ, i heta spryjaje tvorčaści.

A čym na žyćcio zarablaješ, bo ja tak razumieju, na muzycy ŭ Biełarusi nie asabliva možna zarabić, kali ty nie Maks Korž, viadoma…

– Možna zarabić. Na prodažy dyskaŭ – nie, a na kancertach – spakojna. U pryncypie, topavyja biełaruskamoŭnyja artysty spakojna mahli b źbirać Pałac Respubliki. Ja zarablaju na chleb tvorčaściu. Ja nie siadžu ŭ ofisie i nie pradaju hazasilikatnyja błoki, a rablu toje, što mnie padabajecca. Mnie pakul i nie treba šmat hrošaj. Ja mahu zarabić na kancercie, źniacca ŭ filmie, zrabić aranžyroŭku. Karaciej, kali vyrašyš: voś ja zaraz pradam hazasilikatnyja błoki i zarablu na albom, to nie atrymajecca, ciabie zaciahnie, i zamiest tvorčaści ty budzieš zajmacca biźniesam.

16 śniežnia ŭ kłubie «Placoŭka choł» Vinsent prezentuje svoj novy albom «VIR». Padrabiaznaści tut >>>

Pavialičyć

• 0
• 0
• 0
• 0
• 0
• 0
• 0
• 0