Jak vierniki Biełarusi išli siońnia ŭ kaścioły pa indulhiencyi FOTY
Dziaŭčynka hadoŭ vaśmi trymaje ŭ rukach łampadku, jana pryjšła siońnia da Čyrvonaha kaścioła z mamaj i tatam. «My pojdziem z pracesijaj ŭ «katedru», bo tam siońnia buduć adčyniać bramu miłasernaści», — raspaviadaje dzicia. Siońnia katoliki Biełarusi źjazdžalisia ŭ najbujniejšyja chramy, dzie ŭpieršyniu ŭ historyi adkryvalisia Śviatyja bramy. Ludzi vierać: prajšoŭšy praz Bramu miłasernaści, možna atrymać indulhiencyju — pazbaŭleńnie ad časovaj kary.
Śviatyja bramy adkryli siońnia ŭ bujnych katalickich chramach Biełarusi. U stalicy vierniki sabralisia apoŭdni la kaścioła śviatych Symona i Aleny. Słužbu pierad Čyrvonym kaściołam pravioŭ arcybiskup Tadevuš Kandrusievič.
— Niachaj naša malitva, naša pracesija dałučajecca da ŭsich pracesij Biełarusi. U hetyja hadziny iduć da katedraŭ vierniki roznych haradoŭ, a taksama jadnajmasia z usimi viernikami śvietu, na ŭsich kantynientach, ad adnaho polusa da druhoha. Vierniki kirujuć svaje kroki da katedraŭ, bazylik i sanktuaryjaŭ, — źviarnuŭsia da viernikaŭ kiraŭnik rymska-katalickaj carkvy ŭ Biełarusi.
Pierad kaściołam słuchali jaho sotni ludziej. Spynialisia, nazirajučy za tym, što adbyvajecca, i prostyja minaki.
Minčanka Natalla — katalička, adnak šmat pra toje, što adbyvajecca raspavieści nie moža, kaža, što pryjšła «dakranucca», pabyć čaścinkaj śviata. Žančyna tłumačyć:
— Hady majho stanaŭleńnia patrapili na čas, kali relihija była zabaronienaja. I zaraz, kab dušoj praniknucca hłyboka — treba čas, napeŭna. U kaścioł ja chadžu pa vialikich śviatach, čahości jašče nie chapaje. Ale ja razumieju, što duchoŭnaść heta važna. Kali my, kožny, na svaim miescy, nie zrobim drennaha tamu, chto staić pobač — usio budzie dobra. Razumiejecie, być dobrym dla ŭsich - heta lohka, a voś być dobrym dla kahości — heta kudy składaniej …
Minčanka Jana pryjšła siudy z dačkoj Mašaj i mužam Sašam. Žančyna raspaviadaje, ź jakoj nadziejaj:
— My pryjšli, kab mieć nadzieju trapić na nieba, kab paźbiehnuć časavaj kary, bo spadziajemsia: Pan Boh źbieraže našu siamju, usich našych blizkich, rodnych, usich ludziej, pra jakija my molimsia. Siońnia asablivym čynam molimsia ab usich, kamu patrebna malitva, pra tych, pra kaho nichto nie molicca. My spadziajemsia, što bramy miłasernaści, praź jakija siońnia projdziem, stanuć dla nas varotami nadziei, lubovi, bramami, jakija pryviaduć nas u žyćcio sapraŭdnaje, viečnaje.
Prajści praź Śviatyja varoty aznačaje atrymać indulhiencyju.
— Kali my idziem na spoviedź kožny raz, my atrymlivajem prabačeńnie za našy hrachi, adnak nie pazbaŭlajemsia ad kary, jakuju budziem adčuvać paśla śmierci fizičnaj, — tłumačyć Jana. — Kali ty prachodziš praz «bramu miłasernaści», heta daje nadzieju na toje, što paśla śmierci fizičnaj apyniemsia adrazu ŭ rai i paźbiehniem kary. Padzieja ŭnikalnaja i važnaja: brama miłasernaści zvyčajna adkryvajecca tolki ŭ Vatykanie, i to raz u 25 hadoŭ. Ale pakolki abstanoŭka napružanaja ŭ śviecie ciapier, było vyrašana adkryć bramu miłasernaści praz 15 hadoŭ, nie čakajučy pryznačanaj raniej daty …
Kab atrymać indulhiencyju, treba prajści niekalki abradaŭ. Naprykład, siamja Jany siońnia z ranicy paśpieła paspaviadacca, pryniać udzieł u śviatoj słužbie, pamalicca ŭ intencyi śviatoha ajca.
Minčanka Teresa pryviezła ŭ Čyrvony kaścioł na słužbu svaju mamu. Jadvizie Bajdak — 88 hadoŭ, jana płača, tłumačačy, što pryjechała ŭ Minsk z Hudahaja, što ŭ Hrodzienskaj vobłaści:
- U pracesii nie zmahu prajści, mnie ŭžo mnoha hadoŭ. A pryjechali na imšu, siońnia ž miłasernaść Jezusa i matki Boskaj.
Ad Čyrvonaha kaścioła vierniki nakiravalisia ŭ archikatedralny sabor Najśviaciejšaj Panny Maryi, što na płoščy Svabody. Ludzi išli pa centralnych vulicach Minska i śpiavali «ŭ imia Chrysta», jak zaklikali śviatary. Supracoŭniki AMAPa sačyli za tym, jak ruchajecca pracesija, nie abyšłosia i tut bieź ludziej u cyvilnym, jakija zapisvali na videa toje, što adbyvajecca, stojačy na chodnikach.
Papa Francišak adkryŭ Śviatuju bramu 8 śniežnia ŭ Vatykanie. Hety dzień staŭ pačatkam Jubilejnaha Hoda Miłasernaści, jaki doŭžycca da 20 listapada 2016 hoda. U minuły raz «brama miłasernaści» adkryvałasia ŭ 2000 hodzie.
Kamientary