Dzievianosta piać aryhinalnych hraviur słavutych mastakoŭ Fransiska Hoi i Pabła Pikasa 16 śniežnia prybyli ŭ Minsk. Pra heta paviedamili ŭ kampanii «Bieryn Art Mieniedžmient», jakaja vystupaje arhanizataram vystavy «Hoja… Pikasa», što adkryjecca 21 śniežnia ŭ Nacyjanalnym mastackim muziei Biełarusi.
Kalekcyju hraviur dla vystavačnaha prajekta daŭ madrydski Muziej Karaleŭskaj akademii pryhožych mastactvaŭ San-Fiernanda (Ispanija). Pieravozka tvoraŭ mastactva, ahulny košt jakich składaje 1,4 młn jeŭra, zaniała čatyry dni.
Vystavu ŭ Minsku kuryruje mastactvaznaŭca i skulptar Chuan Bordes. Jon prybudzie ŭ biełaruskuju stalicu 17 śniežnia. U prysutnaści akademika Bordesa i inśpiektaraŭ mytnych słužbaŭ buduć uskrytyja śpiecyjalnyja kantejniery, u jakich pieravozilisia ekspanaty. Chutka paśla hetaha pačniecca mantaž ekspazicyi.
Śpiecyjalna dla vystavy «Hoja… Pikasa» adna z załaŭ Nacyjanalnaha mastackaha muzieja budzie pierafarbavanaja. Palitra ścien budzie zaležać ad tematyki, siužetu i nastroju, jaki zadajecca toj ci inšaj hraviuraj.
Realizacyi prajekta sadziejničaŭ asabista pasoł Biełarusi ŭ Francyi i Ispanii pa sumiaščalnictvie Pavieł Łatuška.
