Adzin z pačynalnikaŭ nacyjanalnaj rok-muzyki, hitaryst, vakalist, saŭndpraduser, aŭtar muzyki i tekstaŭ, lider hurtu Ulis Słava Korań adznačaje ciońnia 60 hod.
Słava Korań naradziŭsia 16 śniežnia 1955 hodu ŭ Pskovie (Rasieja) u biełaruskaj siamji vajskovaha doktara. Ź piaci hadoŭ žyvie ŭ Biełarusi. Skončyŭ Radyjotechničny instytut u Miensku pa specyjalnaści «Aŭtamatyčnyja systemy kiravańnia» (1978).
U muzycy z 1978 hodu. U jakaści hitarysta hraŭ u mienskich rok-kamandach «Lift» (1978—1982),«Studyja 7» (1982—1984), «Bonda» (1982—1988).
U 1988 hodzie zasnavaŭ hurt Ulis, u jakim pieršapačatkova byŭ hitarystam i pisaŭ muzyku. Z 1994 hodu ŭziaŭ na siabie taksama rolu vakalista i aŭtara tekstaŭ hurtu. Vystupaŭ taksama ŭ jakaści hitarysta hurtu «Novaje nieba»(1994—1999) i prajektu «Narodny albom» (z 1997).
Razam z hurtam braŭ udzieł u pieršym festyvali «Basovišča» (1990) i byŭ niaźmiennym jaho chedłajneram ciaham nastupnych 15 hadoŭ.
Udzielnik pieršaha festu «Rok pa vakacyjach» (1993) dy šerahu nastupnych. Braŭ udzieł taksama ŭ festyvalach «Try kolery» (1989—1990), «Rok čystaj vady» (Miensk, 1990), «Syrok» (Maskva, 1990), «Muzykanty śvietu dzieciam Čarnobylu» (Miensk, 1991), Rock Summer (Talin, 1991), Rock-mafia (Sopat, 1991), 29th Sopot Festival (1992), «Salidarnyja ź Biełaruśsiu» (Varšava, 2006), Be Free (Ukraina, 2007—2008).
Maje ŭznaharodu jak najlepšy hitaryst festyvalu «Try kolery», try pryzy festyvalu «Basovišča» i rok-karonu za «Najlepšy albom» na «Rok-Karanacyi-1997» (u składzie prajektu «Narodny albom»). Nieadnarazova vychodziŭ na scenu razam z zorkami suśvietnaha maštabu, takimi, jak Jethro Tull i The Stranglers.
Na pačatku 90-ch Ulis vystupiŭ z seryjaj kancertaŭ u Niamieččynie, Vialikabrytanii i Polščy. Pieršy albom hurtu «Čužanica» (1990) byŭ vydadzieny vializarnym nakładam na firmie «Miełodija» (Rasieja), druhi — «Kraina biełaj chmary» (1991) — vyjšaŭ taksama na kružełkach na bujnym polskim łejble Polskie nagrania, paśla čaho ŭ Varšavie byŭ zasnavany i doŭhi čas dziejničaŭ fen-klub hurtu. Dahetul dziejničaje fen-klub hurtu ŭ Miensku.
Usiaho maje ŭ dyskahrafii 12 albomaŭ, zapisanych u składzie roznych kalektyvaŭ. Z 1989 hodu vystupaje taksama jak saŭndpradusar. U hetaj jakaści zapisaŭ šerah kultavych albomaŭ biełaruskaha roku, jak «LaLaLaLa», «Odzirydzidzina», «Pašpart hramadzianina N.R.M.» hurtu N.R.M., «Maja kraina» i «Cepeliny» hurtu «Novaje nieba». U 2007 hodzie staŭ saŭnpradusaram maładoj rok-kamandy z Połacku Indra. Ciapier žyvie i pracuje ŭ Varšavie.
Film pra Słavu Korania z cyklu «Bieły śpis» Siarhieja Budkina i Alesia Matafonava dla Svaboda TV:
