Mytniki prapanujuć uvieści novyja limity na pasyłki z zamiežnych internet-mahazinaŭ

U Biełarusi mohuć uvieści novyja limity na pasyłki z zamiežnych internet-kramaŭ, zajaviŭ staršynia Dziaržaŭnaha mytnaha kamiteta Juryj Siańko. Adzin z varyjantaŭ — abmiežavać internet-pakupki za miažoj sumaj 200 jeŭra ŭ hod.

Ciapier mytniki viaduć pieramovy sa svaimi kalehami z Rasii i krain JEAES, kab uvieści adzinyja normy na mižnarodnyja pasyłki.

Staršynia Dziaržaŭnaha mytnaha kamiteta Juryj Siańko miarkuje, što ŭ krainach Mytnaha sajuza pavinny dziejničać adzinyja praviły ŭvozu tavaraŭ z zamiežnych internet-mahazinaŭ.

«U ramkach Mytnaha sajuza razumnym, na maju dumku, było b, kali dziejničali adzinyja staŭki mytnych pošlin i ahulnyja normy ŭvozu. Heta było b pravilna. Treba stvarać absalutna roŭnyja ŭmovy dla pieramiaščeńnia tavaraŭ i padychody», — ličyć staršynia Dziaržaŭnaha mytnaha kamiteta.

Biełaruskija mytniki ŭžo prapanavali kaleham z Rasii i inšych krain JEAES «pamienšyć kolkasnyja pakazčyki jak pa vazie, tak i vartasnym abmiežavańni ŭvozu mižnarodnych paštovych adpraŭleńniaŭ», udakładniŭ Jury Siańko. Pavodle jaho słoŭ, pakul krainy JEAES nie pryjšli da adzinaha rašeńnia.

Adzin z varyjantaŭ, jakija prapanujuć mytniki, skaracić limit pa pasyłku da 200 jeŭra ŭ hod. Heta moža zakranuć jak usie pakupki, tak i asobnyja katehoryi tavaraŭ «u zaležnaści ad razumnaści ich vykarystańnia ŭ ekspłuatacyi».

Da prykładu, tavaraŭ praciahłaha karystańnia. «Nie kožny miesiac čałaviek nabudzie płanšet, heta nie ałovak. Nie čaściej, čym raz u hod», - udakładniŭ Juryj Siańko.

Pavodle jaho słoŭ, nie vyklučana, što buduć uviedzienyja novyja limity taksama pa vazie i kolkaści pasyłak. «My ličym, što nieabchodna źnizić kolkasnyja pakazčyki pa biaspošlinnym uvozie tavaru na terytoryju Respubliki Biełaruś, bo internet-handal nabyvaje ŭžo vielmi masavy charaktar. Kolkaść mižnarodnych paštovych adpraŭleńniaŭ u hod vyrastaje praktyčna ŭ hieamietryčnaj prahresii. Kali jašče 4 hady tamu ŭ nas u krainu ŭvoziłasia i afarmlałasia štodnia kala 3 tysiač mižnarodnych paštovych adpraŭleńniaŭ, to siońnia heta dachodzić da 70 tysiač », — pryvioŭ statystyku Juryj Siańko.

Nahadajem, siońnia biełarusy mohuć biaspošlinna atrymlivać z-za miažy pasyłki dla asabistaha karystańnia na sumu nie bolš za 200 jeŭra ŭ miesiac (niezaležna ad kolkaści pakupak).

Kali limit pieravyšany, to daviadziecca zapłacić 30% z sumy pieravyšeńnia. U Rasii hetaja norma składaje 1000 jeŭra i 31 kiłahram u miesiac.

Staršynia Dziaržaŭnaha mytnaha kamiteta udakładniaje, što niaredka ŭvoziacca partyi tavaru, jakija zatym pierapradajucca. «Ale kali heta nabyvaje ŭžo masavy charaktar i pryznačana dla handlu, naturalna, nieabchodna rabić bolš žorstkimi padychody i spyniać padobnyja fakty, — skazaŭ Juryj Siańko. — Nad hetym my siońnia pracujem».

U Biełarusi nieadnarazova zajaŭlali pra namier ŭvieści padatak na pasyłki z zamiežnych internet-mahazinaŭ. Prapanoŭvałasia jaho spahaniać pry apłacie pakupak pa kartcy, ale banki rastłumačyli, što techničnaj mahčymaści heta zrabić niama.

• 0
• 0
• 0
• 0
• 0
• 0
• 0
• 0