Lidera abjadnanaj demakratyčnaj apazycyi Alaksandra Milinkieviča aryštavali na 15 sutak. Apazycyjaner ličyć svoj aryšt śviedčańniem strachu ŭładaŭ pierad masavymi viasnovymi akcyjami.
Sudździa Pieršamajskaha rajonnaha sudu Jury Harbatoŭski pakaraŭ Alaksandra Milinkieviča 15 sutkami aryštu. Milicyjanty abvinavacili lidera apazycyi va ŭdziele ŭ niesankcyjanavanym šeści j mitynhach u časie Čarnobylskaha šlachu. Alaksandar Milinkievič źviartaŭ uvahu na toje, što milicyjanty sami zaklikali ludziej kala cyrku prajści da Akademii navuk, na dazvolenaje ŭładami miesca zboru. Aryštavany tak prakamentavaŭ svoj prysud:
(Milinkievič: ) «Ułada nia ŭmieje i nia choča dziejničać pa zakonie. Nijaki heta nie niesankcyjanavany mitynh. Udzielničali my ŭ absalutna dazvolenym mierapryjemstvie. Kali źbiŭsia hrafik, to heta nia naša vina. Kali my vychodzili na prajeznuju častku, tratuar byŭ zaniaty. Nijakich padstavaŭ sudzić niama. Heta palityčnyja pracesy. Kali mianie papiaredžvali ŭ prakuratury, to ja pra heta i kazaŭ: «Davajcie razam zrobim, kab ludzi spakojna pierajšli». Nia mohuć jany žyć biaz strachu. Jany takija pierapałochanyja. Chočuć nas zapałochać, a sami trasucca».
Kiraŭnik mienskaha adździaleńnia ambasady Švecyi Stefan Eryksan prysutničaŭ na sudzie. Jaho ŭraziła, jak paśla abviaščeńnia prysudu Alaksandra Milinkieviča zaviali ŭ pakoj, dzie ŭžo znachodziŭsia Alaksandar Buchvostaŭ. Tam apazycyjaneraŭ trymali, pakul nie pryviali Siarhieja Kalakina. Specnazaŭcy vyrašyli nia dać žurnalistam zrabić zdymki palitykaŭ, kali tych paviaduć u mašynu. Dziela hetaha milicejski varanok padahnali z dvara da centralnaha ŭvachodu. Jak tolki tam aperatary ŭstalavali kamery, da čornaha ŭvachodu padjechaŭ aŭtobus i tudy chutka paviali aryštavanych.
Dyplamat Stefan Eryksan padzialiŭsia svaimi ŭražańniami sa «Svabodaj»:
(Eryksan: ) «Uražańnie ad biełaruskaha sudu vielmi žachlivaje. Vyhladaje heta vielmi dziŭna. Šmat kamu nie dazvolili prysutničać na sudzie. Toje, što adbyłosia potym, vielmi krasamoŭna. Žurnalisty dy inšyja ludzi čakali, kali vyjduć Milinkievič, Kalakin i Buchvostaŭ. Ale pačalisia niejkija maneŭry, hulni. Kali sud ličyć, što jość padstavy sudzić Milinkieviča, to treba rabić heta adkryta i nie chavać, jak heta było siońnia».
Naziralniki ličać, što aryšty Vincuka Viačorki, Siarhieja Kalakina, Alaksandra Milinkieviča j Alaksandra Buchvostava – nie apošnija. Sustaršyniu niezarehistravanaj arhanizacyi «Małady front» Źmitra Daškieviča vyklikajuć u Pieršamajski rajadździeł milicyi. Tudy ž mohuć dastavić jašče niekalkich aktyvistaŭ, jakija vystupali na mitynhu padčas Čarnobylskaha šlachu.
Ciapier čytajuć
Zialenski ŭ Vilni: Pakul špic Łukašenki maje bolš pravoŭ, čym narod Biełarusi27
Kamientary