Kiraŭnik kampanii «Havary praŭdu» Andrej Dźmitryjeŭ i staršynia Biełaruskaj partyi levych «Spraviadlivy śviet» Siarhiej Kalakin nie bačać nieabchodnaści ŭ praviadzieńni ŭ najbližejšyja miesiacy kanhresa demakratyčnych sił.
Nahadajem, 17 śniežnia hrupa viadomych pradstaŭnikoŭ kultury i hramadskich dziejačaŭ zaklikali apazicyju da kansalidacyi i praviadzieńnia kanhresa demsił dla vypracoŭki dalejšych dziejańniaŭ.
18 śniežnia apazicyjnyja palityki Mikałaj Statkievič, Uładzimir Niaklajeŭ i Stanisłaŭ Šuškievič abviaścili ab stvareńni arhkamiteta pa padrychtoŭcy kanhresa. U toj ža dzień Statkievič paviedamiŭ, što ŭ arhkamitet taksama pahadzilisia ŭvajści Dźmitryj Daškievič, Viačasłaŭ Siŭčyk, Andrej Sańnikaŭ i Hienadź Fiadynič. Pry hetym palityk adznačyŭ, što nie źviartaŭsia z prapanovaj uziać udzieł u kanhresie demakratyčnych sił da lidaraŭ kampanii «Havary praŭdu» i Biełaruskaj partyi levych «Spraviadlivy śviet».
«Pakul tut niama čaho kamientavać, heta tolki słovy. Naša pazicyja vielmi prostaja: napieradzie parłamienckaja kampanija, u hramadstva jość zapyt na pieramieny, treba pracavać ź im, a nie zajmacca ŭnutryapazicyjnymi pieramovami», — zajaviŭ Dźmitryjeŭ.
Jon ličyć, što siońnia bolš efiektyŭna havaryć ab kankretnych rečach i płanie dziejańniaŭ, abjadnaŭšysia vakoł ich, a nie rabić «hučnyja zajavy, jakija na praktycy pryvodziać da jašče bolšaj razdroblenaści i niezadavolenaści adzin adnym». «Abjadnańnie adbyvajecca nie na kanhresach, a padčas sumiesnych dziejańniaŭ. Kanhres ciapier — heta takoje biaskryŭdnaje, u cełym bieskarysnaje mierapryjemstva, jakoje svaim vynikam moža mieć novyja razborki ŭnutry apazicyi», — padkreśliŭ Dźmitryjeŭ.
Kalakin taksama nie razumieje, navošta ciapier pravodzić kanhres. Pavodle jaho słoŭ, na kanhresie možna było b vyrašyć dva pytańni: vybrać lidara napiaredadni prezidenckaj kampanii ci zaćvierdzić prahramu, jakuju padtrymlivaje bolšaść u apazicyi, napiaredadni parłamienckich vybaraŭ. «Ciapier u apazicyi niama daminantnaj idei i stratehii, jakija avałodali b rozumam bolšaści, idzie ich pošuk. Pravieści kanhres, kab kanstatavać adsutnaść abjadnaŭčych idej i płanaŭ, značyć, pakazać niezamožnaść apazicyi. Heta było b pamyłkaj», — skazaŭ palityk.
Kalakin taksama ličyć, što ŭ praviadzieńni kanhresa byŭ by sens, kali b u im uziali ŭdzieł usie apazicyjnyja siły. «Vyrazańnie niejkaha elemienta pa palityčnych mierkavańniach pryviadzie da devalvacyi hetaha mierapryjemstva», — ličyć jon.
