Ad 4 studzienia pry ŭjeździe na most-tunel praz praliŭ Eresun, jaki złučaje Šviecyju i Daniju, budzie ŭviedzieny režym pamiežnaha kantrolu.
Pra heta paviedamiła rasiejskaja słužba Deutsche Welle.
Takim čynam Šviecyja spadziajecca spynić płyń nielehalnych mihrantaŭ, jakija ŭjazdžajuć u krainu. Va ŭsich pasažyraŭ ciahnikoŭ, aŭtobusaŭ i paromaŭ, jakija pierasiakajuć praliŭ, buduć praviarać pašparty i vizy, niahledziačy na Šenhienskaje pahadnieńnie.
Stakholm raptam začyniŭ miažu, pryniaŭšy ŭ 2015 hodzie bolš za 160 000 biežancaŭ, u asnoŭnym ź Siryi, Iraka i Afhanistana.
Takim čynam, Šviecyja ź jaje dziesiaćciu miljonami žycharoŭ akazałasia na pieršym miescy siarod krain Jeŭrasajuza pa kolkaści pryniatych biežancaŭ na dušu nasielnictva.
Pavodle statystyki, roznyja transpartnyja srodki štodnia pierasiakajuć Eresunski most 75 000 razoŭ. Zatrymki ŭ suviazi z pamiežnym kantrolem abyducca ŭ 175 000 jeŭra, padličyli śpiecyjalisty Eresunskaha instytuta.
Akramia taho, novyja miery, jakija abmiažoŭvajuć ŭjezd u Šviecyju, pryviali da spynieńnia naŭprostych čyhunačnych znosin pamiž centralnym vakzałam Kapienhahiena i šviedskaj terytoryjaj.
Pabudavany ŭ 2000 Eresunski most pamiž dźviuma dziaržavami ahulnaj praciahłaściu 7,8 kiłamietra da hetaha času ličyŭsia simvałam jeŭrapiejskaj intehracyi i svabody pieramiaščeńnia, adznačaje ahienctva AP.
Kamientary