U Kyrhyzstanie supracoŭniki milicyi ŭziali pad achovu hramadzianina Vialikabrytanii Majkła Makfita, jaki na svajoj staroncy ŭ fejsbuku nazvaŭ miascovuju nacyjanalnuju stravu čučuk konskim pienisam.
Pra heta 4 studzienia K-News paviedamlaje sa spasyłkaj na UUS Isyk-Kulskaj vobłaści.
U milicyi abvierhli infarmacyju ŚMI pra toje, što Makfit — aŭstralijec. Adznačajecca, što brytaniec, zatrymany ŭ aeraporcie Biškieka, nie byŭ zaklučany pad aryšt.
«Jon pražyvaje ŭ haścinicy ŭ Karakole i jamu zabiaśpiečana achova, bo rabotniki Kumtora vielmi niezadavolenyja jaho słovami», — raspaviali va UUS.
U milicyi taksama paviedamili, što pa fakcie incydentu z Makfitam sabrany materyjały, adnak kryminalnaja sprava pakul nie raspačata.
Pa słovach supracoŭnikaŭ upraŭleńnia, dakumienty pieradadzieny ŭ nahladnaje viedamstva. «Kali pa sabranych materyjałach prakuratura vyrašyć, što namiok na raspalvańnie mižnacyjanalnaj varožaści byŭ, spravu pieradaduć ŭžo ŭ Dziaržaŭny kamitet nacyjanalnaj biaśpieki», — adznačyli va UUS.
Pra zatrymańnie Makfita stała viadoma 3 studzienia. Zamiežny śpiecyjalist, jaki pracuje na załatanosnym rudniku Kumtor u Isyk-Kulskaj vobłaści, źjechaŭ z terytoryi pradpryjemstva, dzie pačałasia zabastoŭka z-za jaho dopisu ŭ sacyjalnych sietkach.
Pradstaŭniki miascovaha prafsajuza vykazali mierkavańnie, što dziejańni brytanca padpadajuć pad artykuł 299 Kryminalnaha kodeksa Kyrhyzstana («Raspalvańnie nacyjanalnaj, rasavaj, relihijnaj abo mižrehijanalnaj varožaści»).
Pa dadzienych The Guardian, Makfit — supracoŭnik kanadskaj kampanii Centerra Gold, jakaja vałodaje rudnikom Kumtor. Paviedamleńnie, u jakim brytaniec nazvaŭ kirhizskuju nacyjanalnuju stravu konskim pienisam, źjaviłasia na jaho staroncy napiaredadni Novaha hoda. Paźniej aŭtar vydaliŭ post i apublikavaŭ inšy, u jakim vybačyŭsia.
***
Čučuk (sudžuch, šužuk, čužuk, sudžuk) — adzin z tradycyjnych vidaŭ kiłbasy ŭ ciurkskich i blizkaŭschodnich narodaŭ. U Kazachstanie i Kyrhyzstanie dla padrychtoŭki hetaj stravy vykarystoŭvajecca pieravažna kanina.
Kumtor źjaŭlajecca najbujniejšym załatarudnym radoviščam Centralnaj Azii. Rudnik raźmieščany na vyšyni bolš za čatyry tysiačy mietraŭ nad uzroŭniem mora, jaho zapasy składajuć kala 700 ton zołata. U Kyrhyzstanie rehularna prachodziać mitynhi, udzielniki jakich patrabujuć nacyjanalizavać pradpryjemstva.
Kamientary