Žycharka Škłoŭskaha rajona Mahiloŭskaj vobłaści, vinavataja ŭ DTZ z udziełam mašyny z kartežu supravadžeńnia, pryhavoranaja da piaci hadoŭ abmiežavańnia voli biez nakiravańnia ŭ kałoniju. Pra heta havorycca ŭ adkazie za podpisam staršyni suda Aršanskaha rajona i horada Oršy Antaniny Karetnikavaj na aficyjny zapyt BiełaPAN.
DTZ mieła miesca 5 lipienia 2015 hoda na aŭtadarozie Orša — Škłoŭ — Mahiloŭ niedaloka ad vioski Aleksandryja. Jak paviedamlaŭ Śledčy kamitet, kala 21.00 23-hadovaja žycharka Škłoŭskaha rajona za rulom «BMV», u sałonie jakoha znachodziłasia šeść čałaviek, vyjechała na pałasu sustrečnaha ruchu, dzie jaje aŭtamabil sutyknuŭsia ź mikraaŭtobusam «Miersedes-Spryntar». Jon znachodziŭsia ŭ składzie arhanizavanaj transpartnaj kałony ŭ supravadžeńni transpartnych srodkaŭ apieratyŭnaha pryznačeńnia z uklučanymi majačkami siniaha i čyrvonaha koleraŭ.
U vyniku sutyknieńnia vadzicielu i trom pasažyram «Miersedesa» byli pryčynienyja cialesnyja paškodžańni. Dvum ź ich spatrebilisia składanyja chirurhičnyja apieracyi, paviedamlaŭ SK.
U vyniku ahladu miesca zdareńnia było ŭstanoŭlena, što sutyknieńnie adbyłosia na pałasie aŭtamabila «Miersedes-Spryntar». Sprava była raspačataja pa č. 2 art. 317 KK (parušeńnie praviłaŭ darožnaha ruchu, što paciahnuła pa nieaściarožnaści pryčynieńnie ciažkaha cialesnaha paškodžańnia). U vadziciela «BMV» staž kiravańnia aŭtamabilem na momant avaryi składaŭ mienš za dva hady.
Sud Aršanskaha rajona i horada Oršy 22 śniežnia 2015 hoda razhledzieŭ hetuju spravu na zakrytym pasiadžeńni.
«Pryhavoram suda abvinavačvanaja V. pryznanaja vinavataj u parušeńni praviłaŭ darožnaha ruchu, asobaj, jakaja kiravała transpartnym srodkam, što paciahnuła pa nieaściarožnaści pryčynieńnie ciažkaha i mienš ciažkaha cialesnaha paškodžańnia, i na padstavie č. 2 art. 317 KK Respubliki Biełaruś joj pryznačanaje pakarańnie ŭ vyhladzie abmiežavańnia voli na termin piać hadoŭ biez nakiravańnia ŭ papraŭčuju ŭstanovu adkrytaha typu z pazbaŭleńniem prava zajmacca dziejnaściu, źviazanaj z kiravańniem transpartnymi srodkami terminam na piać hadoŭ», — paviedamiła staršynia suda.
Pryhavor abskardžany nie byŭ i nabyŭ zakonnuju moc 5 studzienia 2016 hoda.
Karetnikava nie adkazała na pytańnie, ci było paćvierdžana padčas suda, što adnym z udzielnikaŭ DTZ byŭ aŭtamabil z kartežu prezidenta, jak pra heta paviedamlaŭ šerah biełaruskich ŚMI.
Ciapier čytajuć
«Kali ciapier chierova, značyć, heta jašče nie kaniec». Pahutaryli z epatažnym «śviatarom XXI stahodździa», pra jakoha nie było čuvać piać hadoŭ paśla aryštu
Kamientary