Pad Aleksandryjaj BMV urezaŭsia ŭ prezidencki kartež: 5 paciarpiełych, 2 u reanimacyi VIDEA
Avaryja, jakoj nie było ŭ milicejskich zvodkach, adbyłasia ŭviečary 5 lipienia ŭ Viciebskaj vobłaści.
Avaryja adbyłasia na trasie Orša-Škłoŭ–Mahiloŭ viečaram 5 lipienia. Na vychadnych u ahraharadku Aleksandryja, dzie hadavaŭsia Alaksandr Łukašenka, prachodziła štohadovaje śviata «Kupalle» («Aleksandryja źbiraje siabroŭ»). Adkryvaŭ śviata kiraŭnik dziaržavy. Kali Łukašenka na viertalocie adpraviŭsia ŭ Minsk, jaho kartež viartaŭsia ŭ stalicu viečaram u niadzielu.
Kala 21:00 žančyna — kiroŭca BMV, u sałonie jakoha znachodziłasia šeść čałaviek, vyjechała na pałasu sustrečnaha ruchu i ŭrezałasia ŭ «Miersedes Spryntar», jaki jechaŭ u sustrečnym napramku.
— «Miersedes» znachodziŭsia ŭ składzie arhanizavanaj transpartnaj kałony ŭ supravadžeńni transpartnych srodkaŭ apieratyŭnaha pryznačeńnia z uklučanymi majačkami siniaha i čyrvonaha koleraŭ, — paviedamili ŭ Śledčym kamitecie. U viedamstvie, praŭda, nie ŭdakładniajuć nakont prynaležnaści kartežu. Pa infarmacyi «Našaj Nivy», heta byŭ kartež prezidenta.
U vyniku sutyknieńnia kiroŭca i troje pasažyraŭ «Miersedesa Spryntar» atrymali surjoznyja traŭmy. «Dvoje ź ich ciapier znachodziacca ŭ ciažkim stanie paśla praviedzienych składanych chirurhičnych apieracyj. Kiroŭca BMV špitalizavana, ale jaje žyćciu ničoha nie pahražaje», — udakładnili ŭ SK.
Sutyknieńnie adbyłosia ŭ pałasie «Miersedesa», pra što śviedčyć zapis ź videarehistratara, ustalavanaha ŭ «Spryntera».
— Vyvučajucca ŭsie akaličnaści zdareńnia. Pravodziacca dopyty paciarpiełych i śviedak, pryznačanyja ekśpiertnyja daśledavańni. U jakaści padazravanaj pa kryminalnaj spravie, zaviedzienaj pa fakcie parušeńnia PDR, što paciahnuła pa nieaściarožnaści pryčynieńnie ciažkaha cialesnaha paškodžańnia, pryciahnutaja 23-hadovaja žycharka Škłoŭskaha rajona. Staž kiroŭcy padazravanaj — mienš za dva hady, prava na kiravańnie aŭtamabilem joju atrymana ŭ listapadzie 2013 hoda.
Ciapier čytajuć
«Zabić jaho ci adrezać jamu jajki ja nie rašyŭsia». Padrabiaznaści trahiedyi ŭ Hdańsku, dzie vajar katavaŭ bojfrenda, a paśla zabiŭ siabie12
Kamientary