U Akciabrskim rajonie Homielskaj vobłaści mužčyna spyniŭsia, kab padabrać žančynu ź dziciem, jakija hałasavali na trasie. Jon uziaŭ małoha, a maci pakinuŭ na darozie.
Pavodle infarmacyi BiełaPAN, vypadak adbyŭsia 12 studzienia. Žančyna z synam łavili paputku. Kali pierad imi spyniŭsia «Ford», žančyna pasadziła 8-hadovaha chłopčyka ŭ aŭtamabil na piaredniaje siadzieńnie i pajšła da bahažnika, kab pastavić sumki. U hety čas kiroŭca rvanuŭ ź miesca, pakinuŭšy maci na trasie.
Nieŭzabavie kiroŭcu zatrymali. Vyśvietliłasia, što jon jechaŭ za styrnom mašyny, jakuju niadaŭna skraŭ. Sam jon — z Babrujska. Spačatku mužčyna pryjechaŭ u pasiołak Rabkor na dyziel-ciahniku. Nakiravaŭsia sa stancyi ŭ pasiołak, ale pa darozie ŭbačyŭ aŭtamabil «Ford», jaki stajaŭ z pracujučym ruchavikom.
Aŭtamabil byŭ niezačynienym, i złamyśnik naŭprost sieŭ i pajechaŭ na im u napramku vioski Ražanaŭ. Haspadar aŭto, vyjaviŭšy prapažu, nieadkładna paviedamiŭ u milicyju i kinuŭsia naŭzdahon sa znajomym na jaho aŭtamabili. Praź niekalki chvilin da pieraśledu padklučyŭsia aŭtamabil DPS DAI z uklučanymi majačkami.
Ubačyŭšy heta, złamyśnik, jaki paśpieŭ za hety čas skraści jašče i małoha, spyniŭsia i byŭ zatrymany. Dzicia nie paciarpieła.
U toj ža dzień u dačynieńni da padazravanaha była zaviedziena sprava za vykradańnie transpartnaha srodku, a taksama pryznačanyja roznyja ekśpiertyzy, u tym liku psichołaha-psichijatryčnaja.
Kamientary