Pravasłaŭny śviatar z Žuchavič: «Kali ruski miadźviedź pračniecca, to miesca budzie mała ŭsim»
U paniadziełak sajt 1863ch.com zrabiŭ padborku internet-akaŭntaŭ pravasłaŭnych śviataroŭ, jakija słužać u chramach Zachodniaj Biełarusi. Aŭtar artykuła akcentavaŭ uvahu na tym, što zhadanyja śviatary RPC adkryta padtrymlivajuć idei h.zv. «Ruskaha śvietu» i bajevikoŭ «Navarosii», pra što śviedčać ichnija dopisy ŭ sacyjalnych sietkach. A sama RPC, pavodle aŭtara, słužyć dalejšaj rusifikacyi biełaruskaha narodu.
Da adnaho z hetych śviataroŭ, Viktara Rybija, datelefanavałasia «Naša Niva».
Viktar słužyć u Vialikich Žuchavičach na Navahradčynie. Na svajoj staroncy Ukantakcie jon nazyvaje siabie ruskim, jeŭrapiejcaŭ — pidarasami, a Abamu — durniem.
My zapytalisia ŭ jaho, čamu jon tak dumaje i jak heta suadnosicca ź jahonaj śviatarskaj dziejnaściu.
«Kraina svabodnaja ŭ nas, kožny maje prava vykazać svaje pohlady, — adrazu adkazaŭ śviatar, — da taho ž, ja nie pisaŭ ad siabie, ja prosta ŭbačyŭ takoje mierkavańnie i ź im pahadziŭsia».
Ajciec Viktar kaža, što jamu, jak śviataru, ahidna hladzieć na hiej-parady, heta jaho abražaje. Ale čamu hiej-parady atajesamlajucca ŭ jaho z usimi jeŭrapiejcami, śviatar nie patłumačyŭ.
Taksama ajciec Viktar źmiaščaŭ na svajoj staroncy hłumlivuju karcinku, dzie mulciašny Paštaljon Piečkin pryvozić na Zachodniuju Ukrainu «Hruz 200» i kaža, što jon nie addaść truny, «bo ich niama».
«Heta nie hłumleńnie zusim, — pierakonvaŭ nas śviatar, — ja sam z Danbasa. Ja viedaju fakty, kali čałaviek hinie, a Nachvardyja spalvaje jaho ŭ krematoryi, kab nie addavać trup svajakam i nie płacić dapamohi. Chiba voś heta nie hłum? Navat čačency addavali cieły za vykup, a hetyja nie addajuć, svaich źniščajuć», — skazaŭ śviatar.
«Ja aburany tym, što tam adbyvajecca. Ukry bambiać harady, ludzi, kładučysia spać, nie viedajuć, ci pračnucca zaŭtra. Skažycie, ci narmalna, što ukra-chunta robić kumiram dla moładzi Ściapana Banderu, jaki lizaŭ Hitleru boty? Na Zachodniaj Ukrainie moładź vitajecca, vykidvajučy napierad ruku pad «Zih Chajl». Ja suprać hetaha vystupaju, i vy ličycie maju pazicyju nienarmalnaj? Ja nie žadaju nikomu pieražyć toje, što pieražyli maje baćki na Danbasie, kali jany 7 miesiacaŭ siadzieli ŭ padvale, kali ich bambili ŭkry», — kaža ajciec Viktar.
Na pytańnie, ci bačyŭ jon asabista, jak ukrainskaja moładź vitajecca, vykidvajučy «Zih-Chajl», śviatar zapeŭniŭ, što «bačyŭ sam, na videa».
«Na Danbasie ludzi ŭziali ŭ ruki zbroju, jakija nie chacieli žyć pad chuntaj. Tam ruskamoŭnaje nasielnictva», — nie spyniaŭsia śviatar.
Na zaŭvahu, što tyja ludzi mieli na sabie rasijskija šaŭrony, śviatar adznačyŭ, što ściah «Navarosii» i «Rasii» – heta «nie adnoje i toje ž».
«Ale ci čuli vy pra «Navarosiju» da 2014 hoda?» — spytalisia my ŭ śviatara.
Toj adkazaŭ, što nie čuŭ, ale, maŭlaŭ, «ničoha, budzie» (Navarosija).
Ajciec taksama adznačyŭ, što nie bačyć roźnicy pamiž ruskimi i biełarusami. A kali b zajšła havorka pra abjadnańnie, «to jon tolki za».
Ale čamu śviatar i Abamu ličyć durniem?
«Ja viedaju, što amierykancy pastaŭlajuć zbroju ŭkra-nachvardyi. Nachvardyja hetaj zbrojaj vajuje, a apałčency vajujuć tym, što zabirajuć va ŭkraincaŭ. I kali čałaviek ličyć, što jon moža raźviazać Treciuju suśvietnuju vajnu, to chiba jon nie durań?» — miarkuje śviatar.
«I jašče, čamu jon Rasiju trymaje za durniaŭ? Pucina? Ja voś što skažu, Rasiju nie treba dražnić, bo kali ruski miadźviedź pračniecca, to miesca budzie mała ŭsim», — padsumavaŭ śviatar.
Nahadajem, što raniej «Naša Niva» pisała, što na Haradzienščynie dziejničajuć niekalki pravasłaŭnych vajskova-patryjatyčnych kłubaŭ, dzie instruktarami vystupajuć prarasijskija psieŭdakazaki.
Ciapier čytajuć
Inžyniera-kanstruktara z upraŭleńnia «Pielenha», jakoje robić techniku dla rasijskaha vojska, asudzili pa palityčnych artykułach4
Kamientary