Arhkamitet pa praviadzieńni kanhresa demakratyčnych sił 29 studzienia zaklikaŭ dałučycca da praviadzieńnia mierapryjemstva tyja arhanizacyi Biełarusi, jakija bačać krainu «niezaležnaj, demakratyčnaj i jeŭrapiejskaj».
«Ekanamičnaja i palityčnaja situacyja ŭnutry i vakoł Biełarusi vielmi niebiaśpiečnaja. Jana pahražaje nie tolki našaj niezaležnaści, a ŭvohule isnavańniu krainy, niasie pahrozu nie tolki dabrabytu, ale i mirnamu žyćciu našych hramadzian», — havorycca ŭ raspaŭsiudžanym siońnia zvarocie.
Na dumku arhkamiteta, siońnia «ni ad kiraŭnika dziaržavy, ni ad jaho ŭrada niama prapanoŭ pa vychadzie z ekanamičnaha kryzisu, z palityčnaha tupika. Miž tym uzrovień žyćcia katastrafična źnižajecca, pahroza źniešniaha ŭmiašańnia raście. U takich varunkach prapanavać hramadstvu šlach da vyratavańnia krainy, uziać na siabie adkaznaść za budučyniu Biełarusi musić demakratyčnaja supolnaść», — padkreślivajecca ŭ zvarocie.
«Čas vymahaje sumiesnych dziejańniaŭ. Zaklikajem usie partyi, ruchi, arhanizacyi, usich hramadzian, jakim balić serca za Ajčynu, jakija bačać budučuju Biełaruś niezaležnaj, demakratyčnaj, jeŭrapiejskaj krainaj, dałučycca da padrychtoŭki i praviadzieńnia kanhresa demakratyčnych sił!» — zajaŭlajuć členy arhkamiteta.
Nahadajem, praviadzieńnie kanhresa demsił z metaj kansalidacyi apazicyi inicyjavała 17 śniežnia hrupa viadomych hramadskich dziejačaŭ Biełarusi. Na nastupny dzień Mikałaj Statkievič, Uładzimir Niaklajeŭ i Stanisłaŭ Šuškievič abviaścili ab stvareńni arhkamiteta pa padrychtoŭcy kanhresa. Zaraz aproč nazvanych palitykaŭ u skład arhkamiteta ŭvachodziać Dźmitryj Daškievič, Viačasłaŭ Siŭčyk, Andrej Sańnikaŭ, Hienadź Fiadynič i Michaił Pastuchoŭ.
30 studzienia ŭ Minsku adbudziecca pasiadžeńnie sojma Partyi BNF, na jakim płanujecca razhledzieć pytańnie mahčymaha ŭdziełu ŭ arhkamitecie pa praviadzieńni kanhresa demakratyčnych sił.
