Tavarazvarot pamiž Biełaruśsiu j Vijetnamam letaś skłaŭ usiaho 63 miljony dalaraŭ. Ale Łukašenka paabiacaŭ, što praz 2‑3 hady hetaja ličba pavialičycca ŭ 10 razoŭ. Kiraŭnik Biełarusi, musić, zabyŭsia, što praktyčna toje samaje jon kazaŭ padčas papiaredniaha svajho vizytu
Usie zamiežnyja pajezdki Alaksandra Łukašenki prachodziać pa adnym i tym scenary. Dziaržaŭnyja ŚMI tłumačać, jakuju vialikuju rolu adyhryvajuć adnosiny Biełarusi ź Vijetnamam (Kitajem, Abjadnanymi Arabskimi Emiratami, Venesuełaj…). Pry hetym adznačajecca, što dvuchbakovyja dačynieńni majuć nievyčarpalny patencyjał, jaki, na žal, dahetul mała vykarystoŭvaŭsia. Adnak paśla vizytu kiraŭnika Biełarusi ŭsio źmienicca. Tavarazvarot pavialičycca, prynamsi, u niekalki razoŭ, a palityčnyja i kulturnyja suviazi pašyracca.
Da hetaha abaviazkova dadajecca, što padčas vizytu padpisanyja dziasiatki damovaŭ pra supracoŭnictva ŭ roznych halinach. A sam Alaksandr Łukašenka znajšoŭ poŭnaje parazumieńnie pa ŭsich pytańniach z kiraŭnikom Vijetnamu (Kitaju, Abjadnanych Arabskich Emirataŭ, Venesueły…).
Mienavita tak usio adbyvałasia i hetym razam u Chanoi. Pieradusim Alaksandr Łukašenka adznačyŭ blizkaść madelaŭ raźvićcia dźviuch dziaržaŭ.
«U nas ahulnaja idealahičnaja asnova», — zajaviŭ kiraŭnik Biełarusi.
Heta vielmi cikavaja zajava z ulikam taho, što u vijetnamskaj Kanstytucyi dahetul zamacavanaja kirujučaja rola kamunistyčnaj partyi. Hieneralny sakratar KPV Nonh Dyk Mań faktyčna źjaŭlajecca kiraŭnikom dziaržavy.
Ciapierašni tavarazvarot pamiž Biełaruśsiu j Vijetnamam źjaŭlajecca śmiešnym. Za minuły hod jon skłaŭ usiaho 63 miljony dalaraŭ. Ale Łukašenka paabiacaŭ, što praz 2‑3 hady hetaja ličba pavialičycca ŭ 10 razoŭ.
Kiraŭnik Biełarusi, musić, zabyŭsia, što praktyčna toje samaje jon kazaŭ padčas papiaredniaha svajho vizytu ŭ Vijetnam. Ad taje pary minuła 11 hadoŭ, ale, jak śviedčać zhadanyja vyšej ličby i asabistyja pryznańni Łukašenki, «ekanamična‑handlovyja stasunki pamiž našymi krainami znachodziacca na nizkim uzroŭni».
Čakać praryvaŭ ad novaha vizitu naŭrad ci vypadaje.
Adziny bolš‑mienš kankretny vynik — kantrakt na pastaŭku 500 traktaraŭ «Biełaruś». Adnak MTZ pradaŭ by ich Vijetnamu i biez dapamohi Łukašenki.
Akramia inšaha, Łukašenka prapanavaŭ Vijetnamu vykarystoŭvać Biełaruś jak «stratehičnuju placoŭku» ŭ Eŭropie. Samaje cikavaje, što padobnyja prapanovy ŭžo nie adnojčy hučali na adras Kitaju. U 2005 hodzie kiraŭnik Biełarusi zajaviŭ, što naša kraina hatovaja adstojvać intaresy Padniabiesnaj u Starym Śviecie. Napačatku biahučaha hodu śćviardžałasia, što Biełaruś — «apiryšča Kitaju» ŭ Eŭropie. Adnak padobna, što kitajskich tavaryšaŭ hetaja perspektyva nie spakusiła. Tamu ciapier davodzicca prapanoŭvać svaje pasłuhi Vijetnamu,
Projdzie čas, i pra hety vizyt buduć pamiatać chiba specyjalisty. Bo čym usio skančajecca, raspavioŭ sam Łukašenka. 27 sakavika na naradzie pa pytańniach supracoŭnictva z krainami Persydzkaj zatoki jon zajaviŭ, što niezadavoleny ŭzroŭniem realizacyi damoŭlenaściaŭ, dasiahnutych padčas zamiežnych vizytaŭ.
«Mianie naściarožvaje nievykanańnie albo nieadpaviednaje vykanańnie damoŭlenaściaŭ pa vynikach zamiežnych vizytaŭ, — kazaŭ kiraŭnik dziaržavy. — Vy viedajecie maje patrabavańni: nijakich turystyčnych pajezdak. Kali adbyvajucca vizyty, a tym bolš vizyty na vyšejšym uzroŭni, jany pavinny prynosić krainie kankretnyja vyniki. Kali adbyvajucca vizyty na vyšejšym uzroŭni, to ŭsie havorać, što atrymałasia dasiahnuć dobrych damoŭlenaściaŭ. A dzie vynik?»
Hetaje pytańnie tak i zastajecca biez adkazu.
Dźmitryja Łukašenki nie było z baćkam i bratami na adznačeńni 3 Lipienia24
Kamientary