Ministerstva infarmacyi adznačaje rost cikavaści da biełaruskamoŭnaj litaratury — za 2015 hod ahulny tyraž vydańniaŭ na biełaruskaj movie vyras na 17%, paviedamiła na pres-kanfierencyi 8 lutaha ŭ Minsku ministr infarmacyi Lilija Ananič.
Pavodle jaje słoŭ, u minułym hodzie było vydadziena bolš za 10,2 tysiač najmieńniaŭ knih i brašur. «Niahledziačy na tendencyju źnižeńnia cikavaści da čytańnia, Biełaruś pa kolkaści najmieńniaŭ vydadzienych knih nie tak šmat zhubiła, — krychu bolš za 10%. A sukupny knižny tyraž źniziŭsia na 30%», — skazała Ananič. Heta śviedčyć ab tym, što vydavieckija arhanizacyi stali pravodzić «bolš uzvažanuju palityku».
«Biełaruskamoŭnaja kniha nabiraje svaje abaroty, i my pavialičyli nakłady takich knih na 17%, — adznačyła ministr. — Heta ahulnaja tendencyja — rost cikavaści da temy nacyjanalnaj knihi, heta jakraz toje, što i pavinna adroźnivać nacyjanalnaje knihavydańnie. Uvaha da prajektaŭ histaryčnaj tematyki, prajektaŭ, źviazanych z nacyjanalnaj kulturaj, da vydańniaŭ kłasikaŭ i sučasnych piśmieńnikaŭ — usio heta zapatrabavana ŭ hramadstvie i dziaržavie».
Ananič paviedamiła, što ŭ 2015 hodzie ź biudžetu dziaržavy na vydańnie sacyjalna značnaj litaratury było vydzielena bolš za 23 młrd rubloŭ. Za hetyja srodki vychodzili ŭ tym liku knihi, napisanyja šryftam Brajla, vydańni, prymierkavanyja da 70-hodździa Pieramohi nad fašyzmam, a taksama litaratura pradstaŭnickaha charaktaru.
«U ramkach prahramy «Biełarusy ŭ śviecie» my zmahli ŭkamplektavać 30 biblijatečak biełaruskamoŭnych knih sučasnych i kłasičnych aŭtaraŭ i nakiravać ich u biełaruskija dyjaspary zamiežža», — skazała jana.
Pa słovach ministra, litaratura Biełarusi aktyŭna prasoŭvajecca ŭ inšych krainach. Tak, naprykład, sioleta ŭ adnoj z najstarejšych kniharniaŭ Rasii — «Knižnaj łaŭcy piśmieńnikaŭ» u Sankt-Pieciarburhu — źjavicca adździeł biełaruskaj knihi.
Kamientary