Na Tuzin.fm – internet-premjera aŭdyjoprajektu «Dziń-dziliń: para hulać u kazki», jaki składajecca z 12 kazak aŭtarstva Siarhieja Vituški ŭ vykanańni viadomych u Biełarusi asobaŭ i pryśviačajecca ŭsim tym, chto vieryć u svaje siły, niezaležna ad uzrostu i abstavinaŭ.
Aŭdyjoprajekt «Dziń-dziliń: para hulać u kazki» vyjšaŭ na dyskach pry žyćci aŭtara kazak – Siarhieja Vituški roŭna čatyry hady tamu. Jaho realizavaŭ partał Tuzin.fm razam ź Biełaruskim Radyjo Racyja, a paŭdzielničali ŭ zapisie viadomyja muzyki, paety i piśmieńniki, aktory, artysty i navat dyplamat. Siaržuk Vituška, užo ciažkachvory, pačuŭ svaje kazki ŭ ich vykanańni, pryjechaŭ u 2012 hodzie na prezentacyju ŭ Miensk ź Vilni, dzie žyŭ apošnija 20 hod. U tym ža 2012 hodzie, 2 lipienia, va ŭzroście 47 hod jon pajšoŭ u inšy śviet. Rodnyja kažuć, što hety prajekt krychu praciahnuŭ jamu žyćcio.
Užo daŭno razyšoŭsia nakład dysku z hetymi kazkami, a ludzi pastajanna pytajucca dzie ich znajści. Z nahody 4-hodździa prajektu prezentujem jaho ciapier całkam u siecivie.
U prajekcie «Dziń-dziliń: para hulać u kazki» uziali ŭdzieł narodnaja artystka Biełarusi Zinaida Bandarenka, piśmieńniki Uładzimier Arłoŭ, Adam Hlobus, Andrej Chadanovič, tele- i radyjoviadučaja Tamara Lisickaja, aktorka Hanna Chitryk, tahačasny ambasadar Švecyi ŭ Biełarusi Stefan Eryksan, śpievaki Lavon Volski, Źmicier Vajciuškievič, Aleh Chamienka, Aleś Kamocki, Siaržuk Sokałaŭ-Vojuš. Kožny ź ich ahučyŭ adnu z kazak aŭtarstva Siarhieja Vituški, biełaruskaha piśmieńnika ź Vilni.
Ideja prajektu naležyć historyku Siarhieju Chareŭskamu, jaki zadumaŭ zrabić aŭdyjopraciah vydadzienaj u 2011 hodzie knihi Siarhieja Vituški ŭ azdableńni Michała Aniempadystava. Jana stała pieramožcaj u naminacyi «Dziciačaja litaratura» na Radyjo Svaboda i zaniała pačesnuju pazycyju ŭ ahulnym rejtynhu biełaruskich navinak. Ale sam aŭtar jaje nia moh ubačyć. Tak skłaŭsia los, što praz chvarobu jon straciŭ zrok. Tamu znoŭ tałakoj, jak i ŭ kolišnija lehiendarnyja časy, nieabyjakavyja ludzi ździejśnili jašče adzin cud – pieraŭvasobili litary ŭ huki, stvaryŭšy hetuju hukavuju knihu kazak Vituški. Takim čynam jaje pačuŭ i sam hieroj, i tysiačy inšych ludziej pa ŭsim śviecie.
Adnym fajłam možna spampavać adnym fajłam pa spasyłcy
