«Rusafoby»: kisialoŭski sajt «Sputnik Biełaruś» trapiŭ pad krytyku čarnasociencaŭ za niedastatkovuju prarasijskaść

Adzin z čarnasocienskich internet-resursaŭ niadaŭna apublikavaŭ materyjał, u jakim aŭtar, Artur Hryhorjeŭ, krytykuje biełaruskuju viersiju sajta «Sputnik», jaki źjaŭlajecca častkaj rasijskaj kampanii «Rośsija siehodnia», dzie hałoŭnym kiraŭnikom značycca adyjozny Dźmitryj Kisialoŭ.

Skrynšot z sajta.

«Biełaruskamoŭnaja viersija sajta «Sputnik» stvaraje ŭražańnie, što jaje zadačaj źjaŭlajecca arhaničnaje dapaŭnieńnie takich viadomych miascovych rusafobskich vydańniaŭ, jak «Naša Niva» ci «Biełaruski partyzan», — piša aŭtar i padkreślivaje, što «Sputnik» raskručvaje miascovych «rusafobskich publicystaŭ i muzykaŭ», nakštałt Lavona Volskaha, «Dzieciukoŭ», Michałka i «jaraha nacyjanalista» Źmitra Vajciuškieviča.

U dokaz «rusafobskich» nastrojaŭ zhadanych ludziej aŭtary pryvodziać ichnija cytaty z roznych krynic, u tym liku fejsbuka, dzie asudžajecca ahresija Rasii suprać Ukrainy.

Taksama abureńnie čarnasociencaŭ vyklikajuć materyjały pra «rusafobku» Aleksijevič. Maŭlaŭ, navošta čytačam «Sputnika» viedać, što jaje ŭ aeraporcie sustrakali šmatlikija prychilniki z kvietkami?

«Tematyka biełaruskaha nacyjanalizmu, jaki całkam vybudavany na nianaviści da Rasii, prytojena ci adkryta bačna ŭ bolšaści publikacyj «Sputnika», stvarajučy iłžyvaje ŭražańnie, što mienavita rusafobskimi i nacyjanalistyčnymi fantazijami zakłapočana bolšaja častka biełaruskaha hramadstva. Machrovy nacyjanalizm prapahandujecca «Sputnikam» u takich formach, jakija navat na rusafobskich sajtach zvyčajna adrasavanyja samym vuzkałobaj fanatykam «tysiačahadovaj» biełaruskaj historyi, VKŁ i «vyšyvanak». Tak, naprykład, na sajcie paviedamlajecca ab nacyjanalistyčnaj kampanii «Cytuj svajo!», jakaja prapanuje pačać «hod biełaruskaha myśleńnia» z vydańnia zbornika cytat «biełaruskich myślaroŭ», jakija musiać stać častkaj myśleńnia i identyčnaści sučasnaha biełarusa», — krytykujuć kisialoŭski sajt čarnasociency.

Padčas kožnaj zhadki pra niejkaje niezaležnaje ŚMI ci vydaviectva, aŭtar dadaje štamp pra «finansavańnie z zamiežža» i «zachodnija hranty».

Taksama čarnasociencaŭ aburaje toje, što ŭ radziele «Spadčyna» («Spadčyna» jany pierakładajuć, darečy, jak «Rodina»), źjaŭlajucca teksty pra VKŁ zamiest «majučaj tam być» Rasii.

«U praciah prapahandy polskich karanioŭ biełaruskaha narodu apublikavany artykuł da 250-hodździa Michaiła Kleafasa Ahinskaha, pałanez jakoha ledź nie staŭ biełaruskim himnam. Možna pryvieści bieźlič inšych prykładaŭ, što žurnalisty «Sputnika» nie abminuli nivodnaj rusafobskaj temy nacyjanalistyčnych ŚMI», — piša Hryhorjeŭ.

«Čamu Sputnik nie cikavicca prablemami ruskich u Biełarusi? — zadajecca pytańniem aŭtar. — Ab arhanizacyjach rasijskich suajčyńnikaŭ na sajcie niama ni słova. Hetak ža ihnarujucca ruskija piśmieńniki, muzyki i inšyja dziejačy kultury. Pry hetym «Sputnik», kruciačysia vakoł peŭnaha koła niaznačnych i tendencyjna adabranych biełaruskich navin, nie tolki farmiruje ŭ čytača całkam izalavanuju ad usiaho rasiejskaha pravincyjnuju śviadomaść, ale i aktyŭna ŭkaraniaje polskuju i litoŭskuju kulturu ŭ duchu histaryčnaha revizijanizmu. Kali sabrać z roznych krynic antyrasiejskija vykazvańni usich rusafobaŭ, jakija atabarylisia na biełaruskamoŭnym sajcie «Sputnika», to atrymajecca cełaja kniha, toj samy cytatnik «biełaruskich myślaroŭ», jaki, z punktu hledžańnia nacyjanalistaŭ, nieabchodny dla farmavańnia identyčnaści sučasnaha biełOrusa (ci, jak jany kažuć, «BiełArusa»). I ŭsio heta apłačana hrašyma rasijskich padatkapłacielščykaŭ», — piša aŭtar i pry hetym śćviardžaje, što zarobku žurnalista «Sputnika» pazajdzrościli b usie lekary i nastaŭniki Kałuhi ci Čelabinska.

«Nie zusim zrazumieła, čamu sajt-prajekt rasijskaj miedyjahrupy prasoŭvaje nacyjanalizm, rusafobiju i skažonaje ŭjaŭleńnie pra Rasiju i ruskich. Ciažka pazbavicca ad pačućcia, što «Sputnik» źbiŭsia z kursu i krucicca na čužoj arbicie», — padsumoŭvaje aŭtar.

• 0
• 0
• 0
• 0
• 0
• 0
• 0
• 0