Siabroŭki skrali ŭ pjanaha kavalera $3900 i spuścili ich na boŭlinh i mužčynski stryptyz

Dźvie dziaŭčyny padazrajucca ŭ kradziažy vialikaj sumy hrošaj u 47-hadovaha žychara Minskaj vobłaści, paviedamili ŭ adździaleńni infarmacyi i hramadskich suviaziej UUS Minskaha abłvykankama.

Mužčyna, jaki źviarnuŭsia ŭ milicyju i zajaviŭ pra zhubu hrošaj, raspavioŭ apieratyŭnikam davoli ramantyčnuju historyju pra toje, što hulajučy ŭ adzinocie pa viačernim Miensku ŭ rajonie čyhunačnaha vakzała, jon paznajomiŭsia ź dźviuma siabroŭkami. Paśla razmovy z adnoj ź ich u paciarpiełaha ŭspychnuła ŭzajemnaja simpatyja. Para praciahnuła viečar za šklanačkaj-druhoj u kvatery mužčyny. Paśla niekalkich tostaŭ za sustreču i znajomstva vyrašana było pierajści da intymu. Pakul dziaŭčyna była ŭ dušy, jon zasnuŭ. Pračnuŭšysia, mužčyna nie znajšoŭ ni novaj znajomaj, ni asabistych źbieražeńniaŭ — $3900 i kala 1,6 miljonaŭ rubloŭ.

Kali apieratyŭniki stali praviarać historyju mužčyny, vyśvietliłasia, što ŭsio było zusim inakš. Jak akazałasia, u toj dzień žychar Minskaj vobłaści vyrašyŭ naviedać svajho siabra ŭ stalicy. Pakul mužčyna dabraŭsia da patrebnaha adrasu, jon paśpieŭ dobra zapravicca śpirtnym, tamu ledź nie zasnuŭ, tolki pierastupiŭšy paroh kvatery siabra. Pakryŭdžany haspadar vystaviŭ pjanaha hościa za paroh. Pasiadzieŭšy niekatory čas na leśvičnaj kletcy i trochi praćvierazieŭšy, žychar Minskaj vobłaści sabraŭsia jechać dadomu i adpraviŭsia na čyhunačny vakzał. Tam pobač z mužčynam spyniłasia taksi, i dźvie siabroŭki, jakija siadzieli ŭ jaho sałonie, zaprasili mužčynu razbavić ich kampaniju. Užo ŭ darozie vyśvietliłasia, što dziaŭčaty nakiroŭvajucca ŭ jaho rodny pasiołak, dzie ŭ adnoj ź ich žyvie siastra. Pa pryjeździe na miesca akazałasia, što ŭ spadarožnic skončylisia hrošy — jašče da sustrečy z kavaleram siabroŭki abjechali na hetym taksi niekalki kłubaŭ, tak što suma na ličylniku nabiehła prystojnaja.

Dziaŭčaty prapanavali mužčynie raźličycca z kiroŭcam uzamien na intymnyja pasłuhi. Žychar Minskaj vobłaści pahadziŭsia, i kampanija padniałasia ŭ jaho kvateru pa hrošy. Naziralnyja damy zaŭvažyli, adkul mužčyna dastaŭ puchły kanviert z najaŭnymi, kab zapłacić taksistu, i paśla niekalkich čarak harełki, kali jon zasnuŭ, dastali hrošy, vyklikali taksi i źjechali. Raptoŭna pabahaciełyja siabroŭki vyrašyli praciahvać śviata i nakiravalisia ŭ karaokie, boŭlinh, a zaviaršyli noč mužčynskim stryptyzam. Da momantu zatrymańnia apieratyŭnikami dziaŭčyny paśpieli vydatkavać ŭsie hrošy.

Jak akazałasia, adna z padazravanych ŭžo mieła sudzimaść pa art.205 KK Biełarusi (kradziež). Ciapier kryminalnaja sprava pa hetym ža artykule raspačataja ŭ dačynieńni da abiedźviuch tusoŭščyc.

• 0
• 0
• 0
• 0
• 0
• 0
• 0
• 0