Pieršy namieśnik staršyni Viarchoŭnaha suda Valeryj Kalinkovič zajaviŭ, što jon nie viedaje, ci isnuje śpis pamiłavanych čynoŭnikaŭ, asudžanych za karupcyjnyja złačynstvy. A taksama adznačyŭ, što pravam prymać rašeńnie — pamiłavać ci nie, nadzieleny prezident. Pra heta jon paviedamiŭ žurnalistam na pres-kanfierencyi «Vyniki dziejnaści sudovaj sistemy Biełarusi za 2015 hod».
«Ja, ščyra kažučy, takoha śpisu nie bačyŭ. Što tyčycca pryniatych niadaŭna rašeńniaŭ kiraŭnikom dziaržavy ab pamiłavańni šerahu asudžanych, to heta prava dadziena jamu», — adznačyŭ Kalinkovič.
Jon nahadaŭ, što kožny asudžany moža źviarnucca z chadajnictvam ab pamiłavańni. Rašeńnie prymajecca ŭ zaležnaści ad pavodzinaŭ asoby padčas adbyćcia pakarańnia. Prymaje rašeńnie nie sud.
Raniej, nahadajem, z nahody śpisu pamiłavanych byłych čynoŭnikaŭ i top-mieniedžeraŭ, jakija byli pryznačany na kirujučyja pasady, BiełaPAN źviartaŭsia z zapytam u Administracyju prezidenta. Tam admovilisia pradastavić poŭny śpis, spasłaŭšysia na słužbovuju tajamnicu.
«Takoje rašeńnie prezidentam było pryniata z ulikam piersanalnaha padychodu da razhladu kožnaj kandydatury, a taksama charaktaru ździejśnienaha, — havorycca ŭ adkazie na infarmacyjny zapyt. — Pakolki pamiłavańnie ažyćcioŭlena ŭ vyhladzie vyzvaleńnia ad adbyćcia jak asnoŭnaha, tak i dadatkovaha pakarańnia, jakoje praduhledžvaje pazbaŭleńnie prava zajmać peŭnyja pasady abo zajmacca peŭnaj dziejnaściu, dalejšaje pracaŭładkavańnie pamiłavanych asob, u tym liku na kirujučyja pasady, nie supiarečyć zakanadaŭstvu».
Za apošni čas žurnalistam stała viadoma pra niekalki faktaŭ, kali čynoŭniki, jakija trapili za kraty, byli vyzvalenyja i pryznačanyja na kirujučyja pasady.
Na dniach źjaviłasia infarmacyja, što eks-hiendyrektar AAT «Chołdynh «Mahiloŭvadbud» Jaŭhien Ziuzin, asudžany ŭ 2014 hodzie na siem hadoŭ źniavoleńnia za kradziež i atrymańnie bujnoha chabaru paŭtorna, z kanca studzienia 2016 h. uznačaliŭ SVK «Kałhas imia Dziaržynskaha» Babrujskaha rajona.
18 lutaha stała viadoma, što były namieśnik staršyni kancerna «Biełnaftachim» Uładzimir Vołkaŭ byŭ daterminova vyzvaleny i ŭznačaliŭ dyrekcyju abjektaŭ, jakija budujucca Navapołackaha naftapierapracoŭčaha zavoda.
Atrymaŭ daterminovaje vyzvaleńnie, što byŭ asudžany da 2 hadoŭ pazbaŭleńnia voli, były dyrektar Babrujskaha miasakambinata Viktar Chadasievič. Jon pracuje v.a. staršyni SVK «Lipaŭka» ŭ Chocimskim rajonie.
26 studzienia stała viadoma, što daterminova vyzvaleny i pryznačany dyrektaram sielskahaspadarčaha unitarnaha pradpryjemstva «Piatrovičy» były namieśnik hienieralnaha prakurora Alaksandr Archipaŭ.
Daterminova vyjšaŭ na svabodu prysudžany da 8 hadoŭ pazbaŭleńnia voli były hiendyrektar «Mahiloŭdreva» Andrej Usaŭ. Jon pryznačany vykanaŭčym dyrektaram pa vytvorčaści na pradpryjemstva-bankrut «Strommašyna».
A eks-namieśnik staršyni Baranavickaha harvykankama Ihar Stasievič, jakoha asudzili na try hady ŭzmocnienaha režymu za pieravyšeńnie ŭłady i słužbovych paŭnamoctvaŭ, staŭ dyrektaram Baranavickaha kambinata nadomnaj pracy.
