Pradstaŭniki Ministerstva ŽKH nie pryjšli na sustreču z žurnalistami
Pres-kanfierencyju pradstaŭnikoŭ Ministerstva žyllova-kamunalnaj haspadarki Biełarusi, jakaja pavinna była pačacca 2 sakavika ŭ 12.30 u Nacyjanalnym pres-centry (NPC), niečakana admianili.
Mierapryjemstva było anansavanaje NPC jašče ŭ kancy minułaha tydnia z pamietkaj «udakładnić». Pra toje, što pres-kanfierencyja ŭsio ž projdzie, supracoŭniki pres-centra paćvierdzili napiaredadni viečaram.
Blizu pryznačanaha času prykładna paŭtara dziesiatka žurnalistaŭ sabralisia ŭ NPC, adnak pradstaŭniki Minžyłkamhasa tak i nie źjavilisia. Praz 15 chvilin namieśnik dyrektara, načalnik adździeła arhanizacyi infarmacyi NPC Alaksiej Cybulka skazaŭ, što arhanizatary sprabujuć vyśvietlić, što zdaryłasia, bo jašče ranicaj pradstaŭniki ministerstva paćvierdzili svoj udzieł u pres-kanfierencyi.
Praź jašče niekalki chvilin Cybulka paviedamiŭ, što pieršy namieśnik ministra žyllova-kamunalnaj haspadarki Aleh Paskrobka pryjedzie ŭ pres-centr praz 5-7 chvilin, jon spaźniajecca z-za ekstrannaj narady. Adnak u 13.00 stała viadoma pra admienu pres-kanfierencyi. Pavodle słoŭ Cybulki, pieršy namieśnik ministra prynios svaje prabačeńni i zajaviŭ, što jamu treba jechać na inšuju ekstrannuju naradu.
Varta adznačyć, što žurnalisty vykazali pavyšanuju cikavaść da pres-kanfierencyi pradstaŭnikoŭ ŽKH, uličvajučy situacyju, jakaja skłałasia ŭ lutym vakoł taryfaŭ na žyllova-kamunalnyja pasłuhi.
Kamientary