Žanočy futboł u Biełarusi: spartsmienki, pryhažuni — i amal biez zaŭziataraŭ FOTAREPARTAŽ
Absalutna niezaŭvažanym prajšoŭ zimovy turnir pa futbole siarod žanočych kamandaŭ: hledačoŭ na niekatorych matčach było mienš, čym hulcoŭ na poli. Što takoje žanočy futboł u Biełarusi, Svabodzie raspaviali ŭ klubie «Minsk», jaki dva hady zapar udzielničaŭ u Lizie Čempijonaŭ siarod žanočych kamandaŭ.
Čempijanat Biełarusi pa futbole siarod žanočych kamandaŭ pravodzicca z 1992 hodu. Samyja tytulavanyja kamandy — «Babrujčanka» j «Ŭniversytet» (Viciebsk). Ale apošnija try hady čempijonami stanovicca kamanda «Minsk» (na fota).
Čempijanat Biełarusi składajecca z adnoj lihi. Jašče pazaletaś u joj hulali 9 kamandaŭ. Praź finansavyja ciažkaści letaś ich zastałosia ŭžo 6. Kolki kamandaŭ źbiarecca sioleta, da kanca nieviadoma. Pačatak čempijanatu pryznačany na 16 krasavika.
«Klas! Hulaje amal jak ja», — časta kamentujuć hulniu dziaŭčat mužčyny z trybunaŭ.
Jašče 10 hadoŭ tamu mała chto čuŭ pra žanočy futboł u Biełarusi. Ciapier dziciačyja sekcyi pa futbole vielmi papularnyja siarod dziaŭčatak. Ci nia bolšaść hulcoŭ «Minsku» — moładź.
Kamandaŭ mała, i tamu ŭ biełaruskim čempijanacie davodzicca hulać pa čatyry koły. U našych susiedziaŭ — palakaŭ i rasiejcaŭ — uzrovień čempijanataŭ našmat vyšejšy.
Za «Minsk» hulajuć dźvie anhłamoŭnyja lehijanerki ź Nihieryi i čatyry frankamoŭnyja — z Kamerunu. Jany taksama vystupajuć za svaje nacyjanalnyja zbornyja.
Treniroŭki prachodziać na štučnych palach mužčynskaha FK «Minsk», da jakoha adnosicca j žanočaja kamanda. Chatnija hulni taksama prachodziać na tym ža poli, što j u mužčynskaj kamandy — na stadyjonie «Minsk».
Pamočnik trenera Raman Lavicki kaža, što Vyšejšaja liha Biełarusi siarod žančyn adpaviadaje ŭzroŭniu 15-hadovych chłopcaŭ. Časam dziaŭčaty hulajuć akurat z chłopcami hetaha ŭzrostu na treniroŭkach.
Zaŭziataraŭ na žanočym futbole vobmal. U asnoŭnym prychodziać navučenki futbolnych škoł, siabry dy svajaki. Tolki na hulni ŭ Lizie Čempijonaŭ źbiraŭsia amal poŭny stadyjon «Minsk».
«Minsk» hulaje suprać «Zorki-BDU». Tolki «Zorka» i «Nadzieja-Dniapro» (Mahiloŭ) składajuć adnosna surjoznuju kankurencyju mienskaj kamandzie.
Kab padrychtavacca da hulniaŭ u Lizie Čempijonaŭ, «Minsk» časta vystupaje na mižnarodnych turnirach, dzie dziaŭčaty mohuć pasprabavać svaje siły suprać mocnych klubaŭ.
Letaś FK «Minsk» prajšoŭ hrupavy turnir u Lizie Čempijonaŭ i trapiŭ u 1/16 finału. Pakul heta najbolšaje dasiahnieńnie kamandy.
Viaršyniaj karjery biełaruskija futbalistki ličać hulniu ŭ mocnych zamiežnych klubach. Kali ty hulaješ za «Minsk», u Biełarusi dalej niama kudy iści.
Čamuści žanočy futboł u Biełarusi vielmi słaba reklamujecca. Časam hulcoŭ na poli byvaje bolš, čym zaŭziataraŭ.
Tym nie mienš, niahledziačy na ciažkija nahruzki, futboł stanovicca ŭsio bolš papularnym siarod dziaŭčat u Biełarusi. Mnohija vyrašajuć zrabić futboł svaim asnoŭnym zaniatkam.
Sezon 2016 hodu «Minsk» pačaŭ ź pieramohi ŭ zimovym turniry, jaki ŭpieršyniu pravodziŭsia sioleta.
Ciapier čytajuć
Adciskańni z tatam, uroki z mamaj. Jak žyvie i vučycca siamja Sieviaryncaŭ u Vilni6
Kamientary